ԵՐԵՎԱՆ, 25 փետրվարի– Sputnik. Երևանում Sputnik Արմենիայի աղբյուրը չի հաստատել Ադրբեջանի ԱԳՆ–ի տեղեկությունն այն մասին, որ Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հանդիպումն է նախապատրաստվում։
«Հանդիպման վերաբերյալ ոչ մի հստակ պայմանավորվածություն չկա», – ասաց աղբյուրը։
Ավելի վաղ այսօր՝ փետրվարի 25-ին Ադրբեջանի ԱԳՆ մամուլի խոսնակ Լեյլա Աբդուլաևան հայտնել էր, որ Հայաստանի ու Ադրբեջանի առաջնորդների մակարդակով հանդիպում է նախապատրաստվում։
«Դեռ Ադրբեջանի ու Հայաստանի առաջնորդների հանդիպման ժամկետների վերաբերյալ հստակ տեղեկություն չկա։ Աշխատանքներն այդ ուղղությամբ շարունակվում են», – ադրբեջանական ԶԼՄ–ների փոխանցմամբ հայտնում է Աբդուալևան։
Նրա խոսքով` այդ հարցը քննարկվել է ԵԱՀԿ Մինսկի խմբի տարածաշրջան վերջերս իրականացրած այցի ժամանակ։
Նշենք, որ երկու առաջնորդների հանդիպման հնարավորությունը քննարկվել է Փարիզում հունվարի 16–ին կայացած Հայաստանի ու Ադրբեջանի արտգործնախարարներ Զոհրաբ Մնացականյանի ու Էլմար Մամեդյարովի բանակցությունների ժամանակ։