ԵՐԵՎԱՆ, 22 փետրվարի — Sputnik. Հայաստանի մի շարք քաղաքային հիվանդանոցներում բանտարկյալների համար մահճակալներ կհատկացվեն։ ԱԺ մարդու իրավունքների պաշտպանության և հանրային հարցերի մշտական հանձնաժողովի աշխատանքային քննարկման ժամանակ այս մասին ասաց ՀՀ արդարադատության նախարար Արտակ Զեյնալյանը։
Մասնավորապես, կառավարության որոշման համաձայն, այդ տեղերը կհատկացվեն Երևանի, Գյումրու և Վանաձորի որոշ բուժկենտրոններում։
Նախարարը նշեց, որ այդ հիվանդանոցները համապատասխան ձևով կկահավորվեն, մասնավորապես, պատուհանների վրա ճաղեր կտեղադրվեն։
Զեյնալյանի կարծիքով, բժշկական ծառայությունը պետք է դուրս բերվի քրեակատարողական հիմնարկի ղեկավարության անմիջական ենթակայությունից։
«Կառավարության որոշմամբ այն կանցնի արդարադատության նախարարության անմիջական կառավարման տակ։ Այդ համակարգի աշխատատեղերի շուրջ 30% թափուր են։ Դրանք բուժաշխատողներին չեն գրավում։ Հենց այդ պատճառով էլ մենք պետք է այստեղ բարձրացնենք սոցապահովման մակարդակը», – նշեց արդարադատության նախարարը։
Նա ավելացրեց, որ կադրերի պակաս է զգացվում նաև բանտերում։ Դեպքեր են լինում, երբ մի աշխատակիցը 7 մարդու գործ է կատարում։