ԵՐԵՎԱՆ, 19 փետրվարի – Sputnik. Ավելի քան 10 օր է` հայ մասնագետները մարդասիրական առաքելություն են իրականացնում Սիրիայում։ Sputnik Արմենիան հրապարակում է նրանց լուսանկարները։
Լուսանկարներում երևում է, որ հայ սակրավորները ականազերծում են տարածքը։ Աշխատանքներն իրականացվում են Հալեպի հարակից տարածքում։ Դեռ ութ ամիս առաջ այստեղ մարտեր էին մղվում, որոնցից հետո չպայթած ռազմամթերք ու ականապատ դաշտեր են մնացել։
Տեղի բնակիչներն օգնության են դիմել հայկական ջոկատին։ 15 հոգանոց խումբը 4 ամսվա ընթացքում պետք է ականազերծի 10 կմ տարածքը։ Պաշտպանությունն ապահովում է ռուսական ռազմական ոստիկանությունը։
Sputnik Արմենիայի աղբյուրը հայտնում է, որ սարքավորումները տրամադրել է ռուսական կողմը։
Փետրվարի 8–ին Հայաստանի Պաշտպանության նախարարությունը հաղորդել է այն մասին, որ 83 հոգուց բաղկացած մասնագետների խումբը ժամանել է Սիրիա։ Խմբի կազմում ներգրավված են հումանիտար ականազերծման մասնագետներ, բժշկական անձնակազմ և մասնագետների անվտանգությունն ապահովող բրիգադներ։