ԵՐԵՎԱՆ, 18 փետրվարի – Sputnik. Հայաստանը շարունակում է Սու–30ՍՄ–ի հաջորդ խմբաքանակի մատակարարման բանակցությունները։ ՌԻԱ Նովոստին հայտնում է, որ ՀՀ պաշտպանության նախարար Դավիթ Տոնոյանն այս մասին ասել է IDEX-2019 ռազմարդյունաբերական ցուցահանդեսում։
Նա նշել է, որ Երևանը 12 Սու-30ՍՄ կործանիչ գնելու ցանկություն ունի։
«Մենք շարունակում ենք բանակցել Սու–30СՍՄ հաջորդ խմբաքանակի մատակարարման վերաբերյալ։ Ամեն ինչ կախված է նրանից, թե որքան արագ կարող է պատրաստ լինել այդ արտադրանքը։ Մենք նախատեսում ենք առաջին խմբաքանակը ստանալ այս տարի, ծայրահեղ դեպքում` հաջորդ տարվա սկզբին», – ասել է ՀՀ պաշտպանության նախարարը։
Հիշեցնենք` ավելի վաղ ՀՀ պաշտպանության նախարարությունը Sputnik Արմենիայի հարցմանն ի պատասխան հայտնել էր, որ ռուսաստանյան Սու–30ՍՄ ինքնաթիռների ձեռքբերման վերաբերյալ համապատասխան գործարքը ստորագրվել է։
Սու–30ՍՄ–ը ռուսական արտադրության բազմաթիրախային կործանիչ է։ Իր տեխնիկական և թռիչքային բնութագրերի շնորհիվ Սու-30ՍՄ–ը դասվում է 4++ սերնդի շարքը։ Այս մեքենայի գլխավոր նպատակը օդային տարածությունում գերիշխանություն հաստատելն է։ Այն կարող է կատարել իր առջև դրված առաջադրանքները` անկախ եղանակից և օրվա ժամից։