ԵՐԵՎԱՆ, 18 փետրվարի — Sputnik. Կոտայքի մարզի Գառնի համայնքի թիվ 1 հիմնական դպրոցի տնօրենը դպրոցի բյուջեից շուրջ 4 մլն դրամի չարաշահումներ է կատարել։ Հայտնում են ՀՀ ոստիկանության լրատվական ծառայությունից։
Իրավապահները պարզել են, որ դպրոցի տնօրենը 2004- 2017 թվականների ընթացքում իր ամուսնուն հրամանագրել է նախ որպես դպրոցի էլեկտրիկ-փականագործ, ապա պահակ և հնոցապան։
Տնօրենի ամուսինն այդ հաստիքներից ոչ մեկում աշխատանքի չի հաճախել։ Իսկ նրա անվամբ դուրս գրված աշխատավարձը` 3 949 000 դրամը, յուրացվել է։
Ոստիկանությունում հարուցվել է քրեական գործ`առանձնապես խոշոր չափերի յուրացման փաստով։
Քննությունը շարունակվում է։