ԵՐԵՎԱՆ, 18 փետրվարի — Sputnik. Մատենադարանի հարակից տարածքում հացադուլ հայտարարած կինոռեժիսոր Հովհաննես Գալստյանին հացադուլի 15-րդ օրը` փետրվարի 17-ին, այցելել է ՀՀ կրթության և գիտության նախարար Արայիկ Հարությունյանը։
Facebook սոցիալական ցանցի իր էջում այս մասին հայտնել է կինոռեժիսորը։
«Մեր համակիրների հավաքի ու բացօթյա համերգի ժամանակ անսպասելի ու հաճելի հանդիպում ունեցա Արայիկ Հարությունյանի հետ։ Նախարարը եկել էր հացադուլը դադարեցնելու հորդորով ու խնդրին ամբողջ խորությամբ ծանոթանալու նպատակով։ Շնորհակալ եմ»,– գրել է նա։
Հացադուլի մեջ գտնվող ռեժիսորին երեկ այցելել է նաև ՀՀ Մարդու իրավունքների պաշտպանի ներկայացուցիչը։ Ինչպես հայտնում են ՄԻՊ գրասենյակից, Հովհաննես Գալստյանը նրա հետ զրույցում հաստատել է իր պահանջը՝ կապված կինոնկարահանման համար նախատեսված ոչ բավարար չափի գումար փոխանցելու հետ:
Կինոռեժիսորի բարձրացրած խնդրի վերաբերյալ Մարդու իրավունքների պաշտպանը դիմել է Մշակույթի նախարարություն։
«Թեև Հովհաննես Գալստյանի գումարի փոխանցման հարցն ինքնին Մարդու իրավունքների պաշտպանի լիազորությունների տիրույթում չէ, այնուամենայնիվ պաշտպանը գրություն է ուղարկել Մշակույթի նախարարություն՝ պարզելու հարցի լուծման ուղղությամբ նախարարության դիրքորոշումն ու խնդրի քննարկման հետ կապված հարցերը»,– հայտնում են ՄԻՊ–ից։
Նշենք, որ Parallels Film Production ընկերությունը, որը գլխավորում է Հովհաննես Գալստյանը, պետք է նկարեր «Տատիկիս վարսերը» գեղարվեստական կինոնկարը։ Այդ ֆիլմը Բուլղարիայի, Գերմանիայի և Հայաստանի առաջին համատեղ նախագիծն է։ Հայաստանի Ազգային կինոկենտրոնը ֆիլմի ֆինանսավորման համար պետք է հատկացներ 88 միլիոն դրամ։ Դրանից տրամադրվել է ընդամենը 23 միլիոնը։ Սակայն 2017թ.–ի ապրիլին Հայաստանի մշակույթի նախկին նախարար Արմեն Ամիրյանը Գալստյանից խնդրել է հինգ միլիոն դրամ։ Այդ միջոցները պետք է տրամադրվեին Կաննի կինոփառատոնին հայկական պատվիրակության մասնակցությունը կազմակերպելուն։ 2018թ.–ի սկզբին Հայաստանի Ազգային կինոկենտրոնը հաստատել է նոր կանոնադրությունը և, օրենքը խախտելով, չեղարկել ավելի վաղ ընդունված պարտավորությունը` կապված ֆիլմի ֆինանսավորման հետ։