ԵՐԵՎԱՆ, 17 Փետրվար — Sputnik. Հայաստանի մի շարք համայնքներում այսօր ՏԻՄ ընտրություններ են։
Առավոտյան ժամը 08:00-ի դրությամբ 24 համայնքներում բացվել են ընտրական տեղամասերը:
Գեղարքունիքի, Կոտայքի, Արարատի, Վայոց ձորի, Շիրակի, Արագածոտնի, Արմավիրի, Տավուշի և Լոռու մարզերի 20 համայնքներում քաղաքացիներն ընտրում են համայնքի ղեկավար:
Արմավիրի և Տավուշի մարզերի 4 համայնքներում էլ անցկացվում են ավագանու անդամի ընտրություններ։ Ընտրական տեղամասերը կփակվեն 20:00-ին:
24 համայնքից 14-ում ընտրությունները հերթական են, իսկ 10-ում՝ արտահերթ:
Փետրվարի 7-ի ժամը 18:00-ին լրացել էր ՏԻՄ ընտրությունների համայնքի ղեկավարի և ավագանու անդամի գրանցված թեկնածուների կողմից ՀՀ կենտրոնական ընտրական հանձնաժողով ինքնաբացարկի դիմումներ ներկայացնելու ժամկետը:
Սահմանված ժամկետում ընտրություններին որպես համայնքի ղեկավարի թեկնածու գրանցված 74 քաղաքացիներից 9-ը ներկայացրել է ինքնաբացարկի դիմում: Ավագանու անդամի գրանցված 62 թեկնածուներից ինքնաբացարկի դիմում է ներկայացրել 2 թեկնածու:
ՏԻՄ ընտրություններին մասնակցող համայնքի ղեկավարի բոլոր 65 և ավագանու անդամի 60 թեկնածուները ինքնառաջադրվել են: