ԵՐԵՎԱՆ, 16 փետրվարի — Sputnik. Հայաստանի հիմնական քաղաքական առաջնահերթություններից մեկը իրենց վճարած հարկերի ու հարկային պարտականությունների նկատմամբ ՀՀ քաղաքացիների վերաբերմունքը փոխելն է։ Կառավարության մամուլի ծառայության հրապարակած հաղորդագրության համաձայն` այս մասին այսօր վարչապետի մոտ տեղի ունեցած խորհրդակցության ժամանակ ասել է Նիկոլ Փաշինյանը։
«Վերջին շրջանում շատ քննադատություններ են հնչել ՊԵԿ-ի աշխատանքի վերաբերյալ, և այդ թեմային անդրադարձեր մենք ունեցել ենք նաև Ազգային ժողովում քննարկումների ժամանակ: Շատ կարևոր է, որ ի վերջո կարողանանք փոխել հանրության որոշակի մասի ընկալումը, եթե շատ պատկերավոր ասեմ, կներեք այս պատկերավոր ձևակերպման համար, թե Պետեկամուտների կոմիտեն ապրում է իրենց հաշվին և իրենց շահերի հաշվին: Շատ կարևոր է, որ հանրությունը տեսնի և զգա, որ Պետական եկամուտների կոմիտեն անհաղորդ չէ իր հասցեին հնչող քննադատությունների վերաբերյալ, սկսած շարժուձևից, աշխատանքի ոճից, ընդհանուր բովանդակությունից և կեցվածքից»,– ասել է նա։
Փաշինյանը հույս է հայտնել, որ ՊԵԿ–ին կհաջողվի փոխել քաղաքացու վերաբերմունքն ու հանրությանը ներկայանալ նոր կերպարով։ «Եվ այդ կերպարը չլինի ուղղակի, այսպես ասած, փիառ գործիք, այլ լինի խորը բովանդակային վերլուծության, քննադատությունների, խորը հաշվառման և արդարացի քննադատություններին արձագանքման տրամաբանության մեջ»,– ասել է նա:
Վարչապետը նաև նշել է, որ խնդիրն իշխանության համար ունի ռազմավարական նշանակություն՝ տնտեսական հեղափոխության համատեքստում։
«Պայմանավորվենք, որ մենք ժամանակ առ ժամանակ կքննարկենք, թե մենք ինչ փոփոխություններ ենք կարողացել անել այս տրամաբանության մեջ և ինչ արդյունքների ենք հասել: Պետք է ուշադիր հետևենք նաև հանրության արձագանքին այս գործընթացի և ակնկալվող փոփոխությունների նկատմամբ»,- նշել է վարչապետ Փաշինյանը:
Հանդիպման ընթացքում ՊԵԿ պատասխանատուները վարչապետին են ներկայացրել կոմիտեի գործառույթների և հարկային վարչարարության արդիականացման նոր ծրագիրը` նշելով, որ այն մշակվել է միջազգային փորձի հիման վրա:
«Մենք հավատում ենք մեր ապագային և վճարում ենք մեր հարկերը». ՊԵԿ–ի նոր ծրագրով այս կարգախոսն է ընտրվել հանրության հետ հարաբերվելու համար։