ԵՐԵՎԱՆ, 16 փետրվարի – Sputnik. Ազգային ժողովի նախագահ Արարատ Միրզոյանն իր վարորդ ընկերոջն աշխատանքի է տեղավորել խորհրդարանում։ Այս մասին գրում է «Հրապարակ» օրաթերթը։
«Երեկ ԱԺ աշխատակազմի ղեկավարի տեղակալ է նշանակվել Սամվել Մելիքսեթյանը՝ հեղափոխության օրերին Միրզոյանի քայլընկերը։ Իշխանության գալուց հետո Միրզոյանի հովանավորչությամբ նա նշանակվեց Մարզահամերգային համալրի տնօրենի ժամանակավոր պաշտոնակատար, հավակնում էր դառնալ նաև տնօրեն, սակայն այս պաշտոնին հավակնում էր նաև փոխվարչապետ Տիգրան Ավինյանի հովանավորյալ Կարեն Կազարյանը՝ Շարմի Կարենը, և Ավինյանը հաղթեց այս պայքարում, ու ՄՀՀ տնօրեն դարձավ նրա թեկնածուն»,– նշված է հոդվածում։
Թերթը հիշեցնում է, որ Սամվել Մելիքսեթյանը հեղափոխությունից առաջ «Անի» հյուրանոցի վաստակավոր վարորդն էր և տուրօպերատորի ավտոբուսով Հայաստան եկածներին էր ման տալիս այս ու այն կողմ։