ԵՐԵՎԱՆ, 16 փետրվարի — Sputnik. «Ղեկը աջ» նախաձեռնության ներկայացուցիչներն ուզում են հանդիպել ՀՀ վարչապետ Նիկոլ Փաշինյանի հետ, որպեսզի նորից քննարկեն աջ ղեկով մեքենաների ներմուծման հարցը։ Sputnik Արմենիայի թղթակցի հետ զրույցում այս մասին ասաց նախաձեռնության ներկայացուցիչ Զորիկ Իգիթյանը։
Ամիսներ տևած քննարկումներից հետո կողմերը փոխզիջումային տարբերակ էին գտել 2018 թվականի դեկտեմբերին։ Որոշվել էր, որ աջ ղեկով ավտոմեքենաները, որոնք գնվել են մինչ 2018 թվականի դեկտեմբերի 30–ը, կարելի է Հայաստան ներմուծել մինչև 2019 թվականի ապրիլի 1-ը և առանց ղեկը փոխելու շահագործել։
Երեկվա նիստում ՀՀ կառավարությունը փոփոխություններ կատարեց «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» ՀՀ օրենքում, որոնց համաձայն` Հայաստան կարելի է բերել միայն այն ավտոմեքենաները, որոնք կուտակվել են «Բագրատաշեն» անցակետում, ոչ թե մինչ 2018 թվականի դեկտեմբերի 30-ը գնվածները։
Այս որոշումը դուր չի եկել աջ ղեկով ավտոմեքենաներ ներկրողներին։
«Հասկանո՞ւմ եք` մի բան է ասվել, իսկ գործնականում այլ բան է ընդունվել։ Վարչապետի հետ հանդիպման ժամանակ ավելի քան հազար մեքենայի մասին ենք խոսել։ Դեկտեմբերյան քննարկումներից հետո շատերը հույս ու վստահություն ունեին, որ հարցը լուծվել է», - ասաց Իգիթյանը։
Նա ընդգծեց, որ ներկրողները ցնցված են, նրանք չգիտեն՝ ում դիմեն ու ինչ անեն։ Միակ հույսը վարչապետն է։ Ամենայն հավանականությամբ Փաշինյանի հետ հանդիպում են պահանջելու՝ հասկանալու համար, թե ինչ է տեղի ունեցել։
Հիշեցնենք, որ վարչապետը կառավարության երեկվա նիստի ժամանակ ասել է՝ որոշումը վերջնական է ու ենթական չէ վերանայման։
Ի դեպ, աջ ղեկով մեքենաներ ներկրելու արգելքը Հայաստանում ուժի մեջ է մտել 2018 թվականի ապրիլի 1-ին։