Կանաչ լույս` աջ ղեկով ավտոմեքենաների համար, բայց ոչ բոլորի

Կառավարությունը որոշել է թույլատրել աջակողմյան ղեկով ավտոմեքենաների ներմուծումը, բայց որոշակի սահմանափակումներով։
Sputnik

ԵՐԵՎԱՆ, 15 փետրվարի — Sputnik. ՀՀ կառավարությունն այսօր վերջապես ընդունեց ամիսներ առաջ խոստացած օրենքի նախագիծը` սահմանին կուտակված աջակողմյան ղեկով ավտոմեքենաների ներմուծումը։

Այդ նպատակով կառավարությունը փոփոխություն կատարեց 2018 թվականի մարտի 1-ին ընդունած «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» օրենքում։

Վանեցյանի առաջարկը վտանգավոր է. սահմանին մնացած աջ ղեկով մեքենաները փչացնում են և թալանում

Նոր օրենքով ավտոմեքենա ներկրողներին թույլ է տրվում աջակողմյան ղեկով ավտոմեքենաները Հայաստան ներկրել մինչև 2019 թվականի ապրիլի 1-ը։ Բայց միայն այն մեքենաները, որոնք ձեռք են բերվել մինչև 2018 թվականի դեկտեմբերի 30-ը և վարորդներն ունեն այդ մասին վկայող փաստաթղթեր։

ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը հայտնեց, որ որոշումը վերաբերում է 442 ավտոմեքենայի։

«Խոսքը պետք է վերաբերի այն մեքենաներին, որոնք արդեն գտնվում են մաքսային գոտում»,– ասաց վարչապետը` խստորեն զգուշացնելով, որ նոր ավտոմեքենաներ այդ ցանկում չեն ավելացվելու։ Որոշումն էլ վերանայման ենթակա չէ։

Ի դեպ, մինչ այդ Հակոբ Արշակյանը հայտարարել էր, որ արդեն գնված ու Հայաստան ուղևորվող շուրջ 412 ավտոմեքենաներ կան (իսկ ընդհանուր թվով` 830), որոնց նախարարն առաջարկում էր թույլ տալ ներկրել Հայաստան։ Բայց վարչապետը թույլ չտվեց` հիշեցնելով, որ «Ղեկը աջ» նախաձեռնության անդամների հետ հստակ պայմանավորվել են միայն սահմանին գտնվող մեքենաների ներմուծումը թույլ տալու վերաբերյալ։