ԵՐԵՎԱՆ, 11 փետրվարի – Sputnik. Մարդու իրավունքների պաշտպան Արման Թաթոյանն այցելել է ՀՀ 2-րդ նախագահ Ռոբերտ Քոչարյանին։ Այսօր ԱԺ–ում լրագրողների հետ զրույցում այս մասին ասաց Թաթոյանը` նշելով, որ առանձնազրույցի ընթացքում բազմաթիվ հարցեր են քննարկել։
«Օրինակ` նա բարձրացրել է տեսակցությունների հետ կապված հարցը ընտանիքի անդամների հետ: Արգելանք կար, բայց կարծում եմ՝ մեր միջամտությունից հետո էր, որ տեսակցություններ թույլատրվեցին»,- ասաց նա։
Ինչ վերաբերում է հարցին՝ արդյոք Ռոբերտ Քոչարյանը քաղաքական հետապնդման է ենթարկվում, Թաթոյանն ասաց, թե ՄԻՊ-ը չունի այն իրավական գործիքները, որպեսզի արձանագրի՝ գործող քրեական գործով քաղաքական հետապնդում իրականացվո՞ւմ է, թե՞ ոչ։ Թաթոյանի խոսքով՝ իրենք մեղադրանքը գնահատելու իրավական հնարավորություն չունեն։
«Մեզ համար նշանակություն չունեն այն հասարակական պատկերացումները, որոնք կան անձի վերաբերյալ, կապ չունի, թե ով է հանցանքի մեջ մեղադրվողը։ Մենք աշխատում ենք օրենքով մեր առաջ դրված խնդիրներին համապատասխան, բնականաբար, կատարում ենք բոլոր հնարավոր գործողությունները»,- ասաց պաշտպանը։
Նա նշեց, որ Քոչարյանը գտնվում էր սովորական խցում, ինչպես մյուս կալանավորները: Աշխատակիցներից դժգոհություն չունի, բայց Երևանի կենտրոն ՔԿՀ խցերը փոքր են:
Թաթոյանը նախկինում էլ է տեսակցել Քոչարյանին։
Հիշեցնենք` ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Քննչական մարմինը Քոչարյանի նկատմամբ խափանման միջոց էր ընտրել կալանավորումը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից:
Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
Իսկ Վճռաբեկ դատարանը փաստաբանների բողոքի հիման վրա որոշում էր կայացրել գործն ուղարկել լրացուցիչ քննության, որի ավարտին վերաքննիչ դատարանը Քոչարյանի նկատմամբ կիրառված կալանքը ուժի մեջ թողնելու որոշում կայացրեց։ Այդ որոշման հիման վրա դեկտեմբերի 7-ին Ռոբերտ Քոչարյանը դարձյալ կալանավորվեց։
Դեկտեմբերի 26-ին Ռոբերտ Քոչարյանի պաշտպանները միջնորդություն էին ներկայացրել դատարան` Քոչարյանի նկատմամբ կիրառված կալանավորումը գրավով փոխարինելու վերաբերյալ։ Ընդ որում, գրավի չափը սահմանելը թողնվել էր դատարանի հայեցողությանը։
2019 թ.–ի հունվարին քննչական մարմինը միջնորդություն էր ներկայացրել դատարան` Քոչարյանի նկատմամբ կիրառված կալանքը ևս երկու ամսով երկարացնելու վերաբերյալ։