ԵՐԵՎԱՆ, 8 փետրվարի – Sputnik. ՀՀ երրորդ նախագահ Սերժ Սարգսյանին այս պահին որևէ մեղադրանք առաջադրված չէ։ Sputnik Արմենիային այս մասին ասաց Հատուկ քննչական ծառայության մամուլի քարտուղար Մարինա Օհանջանյանը` մեկնաբանելով «Հրապարակ» օրաթերթի հրապարակած տեղեկությունը։
Հիշեցնենք` թերթի այսօրվա համարում գրված էր. «Ակտիվորեն սկսել են շրջանառվել լուրեր, որ Սերժ Սարգսյանին մեղադրանք է առաջադրվելու, անգամ կալանք են կիրառելու»: Պարբերականը նշել էր նաև, որ Սարգսյանին երեկ երրորդ անգամ են հարցաքննել և 1500 հարցից կազմված հարցաշար են ներկայացրել նրան։
«Սերժ Սարգսյանը որևէ գործով մեղադրյալի կարգավիճակ չունի»,– Sputnik Արմենիային ասաց Օհանջանյանը։
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։
Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի արդյունքում հազարավոր ցուցարարների հեռացրել էին հրապարակից։
Մարտի 1-ի երեկոյան ԶՈՒ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Արդյունքում հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։
10 տարի չբացահայտված մնացող քրեական գործը թավշյա հեղափոխությունից հետո ՀՔԾ-ում նոր թափ է ստացել։ Հունիսի 3-ին մեղադրանք է առաջադրել ՀՀ պաշտպանության նախկին նախարար Միքայել Հարությունյանին ու նրա նկատմամբ հայտարարել հետախուզում։