ԵՐԵՎԱՆ, 6 փետրվարի — Sputnik. Հայաստանի ազգային հավաքականի և Լոնդոնի «Արսենալի» կիսապաշտպան Հենրիխ Մխիթարյանը Reddit-ում պատասխանել է երկրպագուների հարցերին:
Հայ ֆուտբոլիստն իր օնլայն հարցազրույցի մասին նշել է նաև թվիթերյան իր միկրոբլոգում:
«Խաղի ընթացքում միշտ առաջնորդվում եք նախապես մշակած մարտավարությա՞մբ, թե՞ փորձում եք ձևավորել սեփականը»,–հարցրել են Մխիթարյանին:
« Խաղից առաջ գլխում ունեմ նախապես ծրագրած նախագիծ, սակայն միշտ չէ, որ դրանք աշխատում են այնպես, ինչպես նախատեսել էի: Դրա համար պետք է շատ արագ մտածել և հնարավորինս շուտ որոշում կայացնել: Եթե միայնակ ես և կանգնած է մրցակցի պաշտպանը, մտածելու շատ ժամանակ չունես: Աշխատել եմ 10 մարզիչների գլխավորությամբ: Բոլորը տարբեր էին: Շատ բան եմ սովորել նրանցից: Շնորհակալություն յուրաքանչյուրին: Սա մեծ փորձ էր»,–ասել է Մխիթարյանը:
- Խաղացել եք տարբեր դիրքերում: Որ դիրքում եք խնդիրներ ունեցել և որ դիրքն է Ձեզ ավելի հոգեհարազատ,–շարունակվել է օն լայն հարցազրույցը:
- Ինձ ավելի շատ դուր է գալիս հանդես գալ կենտրոնում, սակայն եզրերում խաղալիս շարժվում եմ այլ մարտավարությամբ: Կարևորն այն է, որ խաղում ես ու կարևոր չէ, թե որ դիրքում: Պարզապես, ցանկանում եմ որքան հնարավոր է շատ օգնել թիմին, որպեսզի հայրենակիցներս հպարտանան ինձնով:
- Ինչպիսին էր Ձեր արձագանքը, երբ իմացաք, որ Օբամեյանգը միանալու է «Արսենալին»: Պատմեք, խնդրում եմ, «Yo Pierre!» տեսանյութի ամբողջ պատմությունը:
- Երբ ես նկարահանեցի այդ տեսանյութը, նա դեռ 100 տոկոսով չէր տեղափոխվել «Արսենալ»: Պարզապես տեղափոխվելու դեպքում ցանկանում էինք նմանատիպ տեսանյութ ունենալ: Երբ լսեցի, որ նա տեղափոխվում է, պարզապես ասացի` հեյ, Պիեր, դու ուզո՞ւմ ես տեղափոխվել:
- Ըստ Ձեզ` 7 լեզվի տիրապետելն օգնո՞ւմ է հանդերձարանում, թե՞ բոլորի հետ շփվում եք անգլերենով:
- Լավ է, որ տիրապետում ես տարբեր լեզուների, սակայն դա երբեմն շփոթեցնում է: Երբ դու ցանկանում ես տվյալ լեզվով համապատասխան բառ գտնել` խճճվում ես: Դժվար է իմանալ տարբեր լեզուներ:
-Որքա՞ն ժամանակ եք տրամադրում ֆուտբոլին:
- Ես շատ եմ մտածում ֆուտբոլի մասին: Մտածում եմ, թե ինչ եմ արել մարզումների ժամանակ: Ինչն էր վատ և ինչն էր լավ: Մտածում եմ, թե ինչպես կարող եմ ավելի լավ անել: Ֆուտբոլային շատ հանդիպումներ եմ դիտում: Չեմ կարծում, որ մարզման ժամանակ կարող եմ դա անել, այդ պատճառով հետո եմ մտածում: Մարզման և հանդիպումների ժամանակ ամեն ինչ շատ արագ է կատարվում:
Վերադառնալով իր մի քանի լեզուներ իմանալուն` Մխիթարյանը նշել է, որ ամենաբարդն իր համար գերմաներենն է, քանի որ այն սովորել է ինքնուրույն: «Արել եմ դա թիմակիցներիս և մարդկանց հետ ավելի հեշտ շփվելու համար: Ամենահեշտը հայերենն է, քանի որ իմ մայրենի լեզուն է: Դպրոցում ուշադրություն չեմ դարձրել անգլերենի վրա, քանի որ սովորել եմ ֆրանսերեն: Եվրոպական ակումբ տեղափոխվելու երազանքի հետ մեկտեղ սկսել եմ անգլերեն սովորել»,–ասել է Մխիթարյանը: