ԵՐԵՎԱՆ, 4 փետրվարի — Sputnik. Անհայտ անձը Երևանի Կոմիտասի պողոտայում գործող շինանյութի խանութի դիմացից վերցրել է ցուցադրվող Baxi ապրանքանիշի ջրատաքացուցիչն ու տարել։
Ինչպես հայտնում են Քննչական կոմիտեից, դեպքը տեղի է ունեցել շուրջ 2 ամիս առաջ` դեկտեմբերի 8-ին՝ ժամը 17:10-ի սահմաններում։
Քննչական մարմինը դեռ չի կարողացել բացահայտել առերևույթ հանցագործություն կատարած անձին։
Այդ նպատակով քննչական կոմիտեն հրապարակել է դեպքի վայրի անվտանգության տեսախցիկների այդ օրվա տեսագրությունը` խնդրելով տեսանյութում պատկերացված անձին ներկայանալ վարույթն իրականացնող մարմին, իսկ նրան ճանաչողներին` տեղեկություններ հայտնել։
Դեպքի առթիվ հարուցված քրեական գործի նախաքննությունը շարունակվում է։