ԵՐԵՎԱՆ, 28 հունվարի — Sputnik, Արմենուհի Մխոյան. 2016 թվականի ապրիլյան դեպքերից հետո Գյումրիի ազատամարտիկների «Շիրակ» պանթեոնի շիրմաքարերն ավելացան, ավելացավ նաև պանթեոն այցելող որդիներին կորցրած ծնողների թիվը:
Ապրիլյան պատերազմում զոհված ավագ լեյտենանտին` Հրաչ Գալստյանին, այսօր`Հայոց բանակի ձևավորման 27 ամյակի առթիվ հարազատները շնորհավորելու էին եկել: Նրանց հետ հորեղբոր գերեզմանին ծաղիկներ էր դնում նաև փոքրիկ Հրաչը, որ հերոսի անունն է կրում: Հրաչ Գալստյանի զոհվելուց հետո ընտանիքում 3 երեխա է ծնվել՝ Հրաչի դուստրը և եղբոր երեխաները, սակայն որդեկորույս մոր համար Հրաչի տեղը թափուր է, թեև վստահեցնում է` թոռնուհին ամեն ինչով հորն է նման:
«Հրաչիս զոհվելուց 1 ամիս հետո աղջիկը ծնվեց՝ Անահիտը, ապա 2 նորածիններ ունեցանք` Հրաչն ու Նարեկը, բայց ամեն մեկն իր տեղն ունի: Ապրում եմ Հրաչիս հուշերով, միայն Անահիտն է, որ ինչ-որ չափով փոխարինում է հայրիկին՝ թե՛ բնավորությամբ, թե՛ արտաքինով շատ նման է նրան»,-Sputnik Արմենիայի հետ զրույցում ասում է Հրաչի մայրը ՝ Անահիտ Գալստյանը` հետո ավելացնելով՝ չէի ուզի հուշերով ապրեի:
Շնորհավորելով հայոց բանակի կազմավորման առթիվ` տիկին Անահիտը հայոց բանակին խաղաղություն է մաղթում, ավելացնելով. «Թող մեր սպաներին գնահատեն կենդանության օրոք, ոչ թե մահից հետո, սա եմ մաղթում մեր ղեկավարներին: Ամենադժվար գործը սպաներինն է»:
Հրաչ Գալստյանը զինված ուժերում էր 2007թ.-ից, ավարտել էր Վազգեն Սարգսյանի անվան ռազմական ինստիտուտը և տեղափոխվել Արցախ, երկու տարի ծառայել էր Մատաղիսում, ապա՝ Թալիշում:
Ապրիլի 3-ին հենց այնտեղ ծավալված ռազմական գործողությունների ժամանակ զոհվել է նա: Այդ դեպքերից ընդամենը 1 տարի առաջ էր ամուսնացել էր: Կինը՝ Անուշը, Մատաղիսից է: Հրաչի ու Անուշի միակ զավակը՝ Անահիտը, ծնվել է հոր զոհվելուց շուրջ մեկ ամիս անց՝ մայիսի 6-ին: Հրաչ Գալստյանը հետմահու պարգևատրվել է «Մարտական ծառայություն» և «Մարտական խաչ» մեդալներով: