ԵՐԵՎԱՆ, 25 հունվարի — Sputnik. ԱԺ նախկին պատգամավոր, ԵԿՄ նախկին նախագահ Մանվել Գրիգորյանին այսօր` հունվարի 25-ին, զրկեցին Արմավիրի պատվավոր քաղաքացու կոչումից։
Արմավիրի ավագանին որոշումը կայացրեց միաձայն։
Ինչպես նիստի ժամանակ ներկայացրեց հարցը զեկուցող Արմավիրի ավագանու անդամը, որոշման համար հիմք է հանդիսացել այն հանգամանքը, որ «պատվավոր քաղաքացու կոչմանը կարող են արժանանալ այն քաղաքացիները, որոնք իրենց երկարամյա անբասիր աշխատանքով բացառիկ դեր են ունեցել, նպաստել են համայնքի զարգացմանը, բարգավաճմանը, կարկառուն ներդրում են ունեցել համայնքի տնտեսական, մշակութային զարգացման գործում»։
Որոշման նախագիծն ավագանու նիստում ընդունվեց առանց քննարկման և հարցուպատասխանի։ Ավագանին որոշեց անվավեր ճանաչել Մանվել Գրիգորյանին պատվավոր քաղաքացի ճանաչելու մասին 12 տարի առաջ կայացրած որոշումը։
Նշենք, որ Մանվել Գրիգորյանն Արմավիրի պատվավոր քաղաքացի էր ճանաչվել 2006 դեկտեմբերի 5-ին քաղաքային իշխանության կայացրած որոշմամբ։ 2006թ–ին Գրիգորյանը դեռ զբաղեցնում էր ՊՆ փոխնախարարի և ԵԿՄ նախագահի պաշտոնը։
Ի դեպ, Էջմիածին քաղաքի պատվավոր քաղաքացու կոչումից Մանվել Գրիգորյանին զրկել էին դեռ 2018թ–ի հուլիսի 24–ին։
Հիշեցնենք, որ «Երկրապահ» կամավորական միության նախկին նախագահ, պատգամավոր Մանվել Գրիգորյանին կալանավորել էին (պատգամավորական անձեռնմխելիությունից զրկելուց հետո) 2018 թվականի հունիսին` ապօրինի զենք պահելու և զինվորների համար նախատեսված պարենամթերքը յուրացնելու մեղադրանքով։
2018թ–ի հունիսի 17-ին ԱԱԾ–ն տեսանյութ էր հրապարակել` ներկայացնելով ԵԿՄ նախագահ Մանվել Գրիգորյանին պատկանող ՀՀ Արմավիրի մարզի Արշալույս գյուղի Լճափնյա փողոցում գտնվող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Դատարանը նախաքննական մարմնի միջնորդությամբ նրա նկատմամբ խափանման միջոց էր ընտրել կալանքը։
Ավելի ուշ այն փոխարինվել էր 25 մլն դրամ գրավով։ Դատախազությունը բողոքարկել էր այս որոշումը Վերաքննիչ դատարանում` պահանջելով նրա նկատմամբ ուժի մեջ թողնել կալանավորման մասին որոշումը։
Վերաքննիչ դատարանը հունվարի 22-ին բավարարել էր միջնորդությունը։ Նույն օրը երեկոյան Մանվել Գրիգորյանը դարձյալ կալանավորվել է։