ԵՐԵՎԱՆ, 23 հունվարի — Sputnik. Արգենտինացի ֆուտբոլիստ Էմիլիանո Սալան, որը եղել է Լա Մանշի մոտ անհետացած ինքնաթիռում, օդանավի անհետանալուց առաջ հաղորդագրություն է ուղարկել։
Հունվարի 22–ին հայտնի է դարձել, որ Նանտից Քարդիֆ ուղևորվող ինքնաթիռն անհետացել է, որի մեջ երկու մարդ է եղել։ Ինքնաթիռը ռադարներից տեսադաշտից անհետացել է Նորմանդական կղզիների շրջանում։
Clarin պարբերականը հրապարակել է ձայնային հաղորդագրություն, որը Սալան WhatsApp-ով ուղարկել է ընկերներին ֆրանսիական Նանտից Քարդիֆ ուղևորվելուց առաջ։
Ձայնային հաղորդագրության սկզբում Սալան ողջունում է ընկերներին և խոսում բազմաթիվ գործերի մասին, որոնք պետք է աներ Նանտում։
«Ես ինքնաթիռում եմ, որը, կարծես թե, շուտով կկործանվի, մեկնում են Քարդիֆ: Եթե մեկուկես ժամից նորություն չլինի, ապա չեմ կարծում`կարիք լինի աշխատակիցներ ուղարկել, որպեսզի փնտրեն ինձ: Հայրիկ, ես շատ եմ վախենում», – մեջբերում է պարբերականը Սալայի խոսքերը։ Ձայնագրության իսկությունը հաստատել է նրա հայրը` Էմիլիանո Օրասիո Սալան։
Իրավապահ մարմինները նշում են, որ ինքնաթիռը վայրէջքի թույլտվություն է խնդրել` անցնելով Գերնսի կղզու վրայով։ Կապը կտրվել է այն պահին, երբ այն սկսել է իջնել։
Կորած ինքնաթիռի որոնումները սկսել են, երբ այն անհետացել է ռադարների էկրաններից, սակայն իրավիճակը բարդացրել են եղանակային պայմանները։ 15 ժամ տևած որոնողական գործողությունից հետո, որի ընթացքում գործարկվել են Մեծ Բրիտանիայի, Ֆրանսիայի և Լա Մանշ նեղուցի կղզիների օդային և ծովային ուժերը, փրկարարները գտել են ջրում լողացող առարկաներ, բայց ուղևորներին առայժմ չեն գտել։
28–ամյա Սալան շաբաթվա վերջին «Նանտի» թիմից տեղափոխվել է «Քարդիֆ Սիթի»։ Ֆուտբոլիստին Քարդիֆում սպասում էին հունվարի 21–ի երեկոյան, նա պետք է առաջին օրը անցկացներ թիմում։