ԵՐԵՎԱՆ, 22 հունվարի — Sputnik. Երևանում անսպասելիորեն բողոքի ալիք է բարձրացել մի քանի տարի առաջ ընդունված «Տեղական տուրքերի մասին» օրենքի դեմ, որը ենթադրում է տարեկան 5 հազար դրամ հարկ յուրաքանչյուր ընտանի կենդանու համար։ ԶԼՄ–ներում տեղեկություններ են տարածվել, որ որոշ կենդանասերներ ակտեր են ստացել հարկերն անպայման վճարելու համար։ Տնային կենդանիների տերերը հավաքվել են քաղաքապետարանի մոտ և իրենց վրդովմունքը հայտնել, քանի որ շատերը կենդանիներին տուն են տարել փողոցից, իսկ հիմա պետք է վճարեն գործած բարության համար։
Sputnik Արմենիայի թղթակցի հետ զրույցում «Իմ քայլը» դաշինքից ավագանու անդամ Էդգար Բարսեղյանը հաստատեց, որ կենդանիների տերերին երկու ակտ է ուղարկվել, սակայն ոչ թե հարկերի, այլ կենդանաբուծության կանոնները խախտելու և բազմահարկ շենքում շներին բազմացնելու համար։ Նա ասաց, որ ընդունված, բայց չկիրառվող օրենքը մի շարք դրույթներ չի կարգավորում և շտկումների կարիք ունի։
«Քաղաքապետարանում ձևավորվել է հանձնաժողով, որն արդեն մշակում է նոր օրենք։ Այն ավելի ընդլայնված և կոնկրետ կլինի։ Կընդգրկվեն տնային կենդանիներ պահողների բոլոր իրավունքները և պարտականությունները», – ասաց Բարսեղյանը։
Նա չբացառեց կենդանիների պարտադիր չիպավորում ներդնելը։ Դա կօգնի լուծել ոչ միայն անտուն կենդանիների հարցը, որոնց տերերն ուղղակի փողոց են շպրտում, այլ նաև տեղեկություն կտա դրանց քանակի մասին։ Ինչպես պատմեց Բարսեղյանը, հնարավոր է`չիպավորումն իրականացվի քաղաքապետարանի հաշվին կենդանիների համար կլինիկայում, որտեղ կբուժեն նաև անտուն կենդանիներին։
«Պետք է նաև հատուկ տեղեր հատկացնել, որտեղ ման կտան շներին։ Մի շարք խնդիրներ լուծելուց և որոշ ծառայություններ տրամադրելուց հետո կարելի է հարկ գանձել, այս դեպքում արդեն կենդանասերները դեմ չեն լինի դրան», – ասաց նա` հույս հայտնելով, որ հարցը կլուծվի ընթացիկ տարում։
Իր հերթին քաղաքապետ Հայկ Մարությանն արդեն քաղաքական մանիպուլյացիաներ է տեսնում տեղի ունեցած բողոքի ակցիաներում։ Նա կարծում է, որ օրինագծի շուրջ աղմուկն արհեստական է, քանի որ քաղաքապետարանը չի պատրաստվում հարկ գանձել` վկայակոչելով թերի օրենքը։ Նա հավաստիացրեց, որ շուտով քաղաքապետարանը խորհրդարան կուղարկի օրենքի լրամշակված տարբերակը։
«Մենք մտադիր ենք պահանջել, խրախուսել կամ խնդրել բոլոր երևանցիներին գրանցել իրենց կենդանիներին, չիպավորել և ամեն տարի պատվաստել։ Չիպերն անհրաժեշտ են կորած կենդանիներին գտնելու և տուգանելու համար այն տերերին, որոնք փողոց են շպրտում նրանց», – ասաց քաղաքապետը։
Ակտիվիստները պատրաստ են սպասել օրենքի նոր նախագծին և այն ուսումնասիրելուց հետո համապատասխան գործողություններ ձեռնարկել։ Տնային կենդանիներ պահողների հիմնական մասը պատրաստ է հարկ վճարել, բայց քաղաքապետարանի կողմից մի շարք ծառայություններ տրամադրելու դեպքում։