ԵՐԵՎԱՆ, 15 հունվարի — Sputnik. «Ժամանակի» հավաստի տեղեկություններով՝ Սյունիքի մարզպետի տեղակալ, ՔՊ անդամ, Կապանի քաղաքապետի նախկին թեկնածու Նարեկ Բաբայանը կնշանակվի Սյունիքի մարզպետ:
Հիշեցնենք, որ Նարեկ Բաբայանը Կապանի քաղաքապետի ընտրություններում առաջադրվել էր «Իմ քայլը» դաշինքից, սակայն, չստանալով բավարար ձայներ, պարտվել էր: «Ժամանակի» հետ զրույցում ինքը՝ Բաբայանը, նշել է, որ նման առաջարկ այս պահին չի ստացել և այդ մասին խոսել չի կարող:
«Ժամանակի» տեղեկություններով՝ փոփոխությունների համատեքստում, Սյունիքի ներկայիս մարզպետ Հունան Պողոսյանը նշանակվելու է ՀՀ ոստիկանապետ Վալերիյ Օսիպյանի փոխարեն:
Պողոսյանը օրաթերթի հետ զրույցում ոչ հերքել, ոչ էլ հաստատել է տեղեկությունը: «Ես ձեզ շատ հարգում եմ, ընդունում եմ, բայց նման ոչ մի հարցի չեմ ուզում պատասխանել, անդրադառնալ:
Ես մարզպետի պաշտոնում պաշտոնավարելու եմ Սյունիքի մարզում, խնդրում եմ՝ ինձ նման հարցեր մի տվեք»,- ասել է Պողոսյանը: «Ժամանակի» հստակեցնող հարցին՝ արդյոք նման
առաջարկ ստացե՞լ է, Պողոսյանը մի պահ լռել, հետո նորից պնդել է, որ այդ թեմայով խոսել չի ցանկանում: