ԵՐԵՎԱՆ, 15 հունվար — Sputnik. ԱԺ «Իմ քայլը» խմբակցությունն ԱԺ Առողջապահության և սոցիալական հարցերի մշտական հանձնաժողովի նախագահի պաշտոնում առաջադրեց պատգամավոր Նարեկ Զեյնալյանի թեկնածությունը:
Նրա ելույթից հետ պատգամավորները հարցեր ուղղեցին Զեյնալյանին: «Լուսավոր Հայաստան» խմբակցության պատգամավոր Մանե Թանդիլյանը հանձնաժողովի նախագահի թեկնածուին հարցրեց, թե արդյոք հետաքրքրվել է երեխաների օրգանների վաճառքի հետ կապված հարցով ու դիմել իրավապահ մարմիններին։ Թանդիլյանի հարցին ի պատասխան՝ Նարեկ Զեյնալյանը խոստովանեց. «Օրգանների վաճառքի մասին առաջին անգամ եմ լսում, եթե կա նման խնդիր, ապա պետք է դիմել իրավապահ մարմիններին, այս մասին ինֆորմացիա չունեմ»։
Ի պատասխան պատգամավորը խորհուրդ տվեց դիմել ավելի փորձառու կուսակցին:
«Եթե երեխաների օրգանների վաճառքի մասին առաջին անգամ եք լսում, կարող եք դիմել Արարատ Միրզոյանին։ Վատ է, որ պաշտոնյաների հայտարարությունների մասին տեղեկանում եք այս դահլիճում»,- երիտասարդ պատգամավորին խրատեց ավագ գործընկերը:
ԱԺ նախագահ Արարատ Միրզոյանը միջամտեց խոսակցությանն ու պարզաբանեց, որ իր խոսքը վերաբերել է այդ ոլորտում միջազգային մաֆիային և այդ մաֆիայից խուսափելու համար ՀՀ-ի ջանքների ներդրմանը։
Հիշեցնենք, հունվարի 9-ին Աժ նիստի ընթացքում, երեխաների որդեգրման մասին օրենքի նախագծի քննարկման ժամանակ դեռևս փոխվարչապետի պաշտոնը զբաղեցնող Արարատ Միրզոյանը հայտարարեց, որ երեխաներին որդեգրում են նրանց օրգանները վաճառելու նպատակով: Իսկ երբ հայտարարությունն անհանգստացրեց կառավարության անդամներին ու վարչապետին, Միրզոյանը հավելեց՝ ըստ օդում կախված լուրերի:
ԱԱԾ պետն էլ հայտարարեց, որ Հայաստանում նման դեպք երբեք չի եղել: