ԵՐԵՎԱՆ, 14 հունվարի — Sputnik. Երևան քաղաքի ընդհանուր իրավասության դատարանի Կենտրոն նստավայրում այսօր, ժամը 15:00-ին կքննվի միանգամից երկու միջնորդություն՝ ՀՀ 2–րդ նախագահ Ռոբերտ Քոչարյանի կալանավորումը գրավով փոխարինելու և նրա կալանքը ևս երկու ամսով երկարաձգելու մասին:
Դատական նիստը կվարի դատավոր Արթուր Մկրտչյանը:
Այս մասին հայտնում են ՀՀ երկրորդ նախագահի փաստաբանական գրասենյակից:
Հիշեցնենք` Ռոբերտ Քոչարյանի խափանման միջոցը փոխարինելու մասին միջնորդությունը ներկայացրել են նրա փաստաբանները, իսկ նախաքննական մարմինը դիմել է դատարան՝ նրա նկատմամբ խափանման միջոց ընտրված կալանքը ևս երկու ամսով երկարացնելու միջնորդությամբ:
Ի դեպ, նախորդ դատական նիստում, որտեղ պետք է քննվեր կալանքը գրավով փոխարինելու հարցը, դատավոր Նելլի Բաղդասարյանը ինքնաբացարկ էր հայտնել: Օրեր անց այդ դատական գործիչ հրաժարվել էր նաև դատավոր Դավիթ Գրիգորյանը՝ պատճառաբանելով, որ հերթապահ չի եղել, բայց գործն իրեն է մակագրվել:
Դրանից հետո գործը մակագրվել է դատավոր Արթուր Մկրտչյանին:
Ռոբերտ Քոչարյանի պաշտպանները կալանավորումը գրավով փոխարինելու վերաբերյալ միջնորդությունը ներկայացրել են դեռևս նախորդ տարի՝ դեկտեմբերի 26-ին, և դատարանին խնդրել են որոշել սահմանվող գրավի չափը: