ԵՐԵՎԱՆ, 12 հունվարի – Sputnik. 6-րդ գումարման Ազգային ժողովի փոխխոսնակ, ՀՀԿ խոսնակ Էդուարդ Շարմազանովն իր աշխատասենյակը հանձնել է այնպես, ինչպես ընդունել է տարիներ առաջ։ Նա այս մասին ասաց Sputnik Արմենիային։
Նշենք, որ այսօր լրատվամիջոցներում տեղեկություն էր տարածվել, թե Շարմազանովն իր աշխատասենյակի համար անձնական գույք էր բերել և գնալիս հետը տարել է:
Շարմազանովը մեզ հայտնեց, որ ինքն Ազգային ժողովում գույք չի ունեցել։
«Ես կահույք չեմ ունեցել, որ տանեմ։ Եթե Սերժ Սարգսյանի, Անդրանիկ Մարգարյանի, Վազգեն Սարգսյանի ու Աշոտ Նավասարդյանի նկարները կահույք են համարում, ապա դրանք ինձ համար կահույք չեն,մասունք են»,– ասաց նա։
Շարմազանովը նշեց, որ հետը տարել է իր գրքերը։
«Մնացած ամեն ինչը թողել եմ։ Ինչպես 2006 թվականին ընդունել եմ սենյակը, նույն ձևով հանձնել եմ»,– ասաց նա։
Շարմազանովը նշեց նաև, որ ավելի արդյունավետ աշխատանք է մաղթում այն պատգամավորին, որը զբաղեցնելու է այդ աշխատասենյակը։
Նշենք, որ ԶԼՄ–ների հրապարկումների համաձայն` այդ սենյակում աշխատելու է «Իմ քայլը» դաշինքի պատգամավոր Ալեն Սիմոնյանը։