Մխիթարյանի` այլ ակումբ տեղափոխվելու տարբերակը սկսեցին քննարկել միաժամանակ Դենիս Սուարեսի տրանսֆերի հետ: Ըստ որոշ լրատվամիջոցների` ակումբի գլխավոր մարզիչ Ունայ Էմերին ուզում է անգլիական թիմում տեսնել «Բարսելոնայի» կիսապաշտպանին: Հենց այս տեղեկությունից անմիջապես հետո համացանցը հեղեղվեց Մխիթարյանի` այլ թիմ տեղափոխվելու լուրերով: Բայց կարևորն այն է, որ այս տեղափոխություններն առայժմ ոչ մի պաշտոնական ամրագրում չունեն, ու պարզ էլ չէ` կունենան, թե ոչ:
Ոմանք գրեցին, որ Դենիս Սուարեսի` «Արսենալ» տեղափոխվելուց հետո Մխիթարյանն իր տեղը կկորցնեի թիմի մեկնարկային կազմում, քանի որ երկուսն էլ խաղում են նույն դիրքում: Բայց մի՞թե դա մոտ է իրականությանը: Էմերին կարող է հայ ֆուտբոլիստին օգտագործել նաև իր թիմի կիսապաշտպանության կենտրոնում, առավել ևս, որ Աարոն Ռեմզիի` «Յուվենտուս» տեղափոխվելն ավելի իրական է, քան Մխիթարյանի` որևէ այլ ակումբ տեղափոխվելը:
Սկզբում նշվեց, որ Հենրիխի ծառայություններով հետաքրքրված է իտալական «Միլանը», հետո «Զենիթը», հետո էլ գրեցին, թե Մխիթարյանին իր կազմում ուզում է տեսնել «Էվերտոնը»: Ֆուտբոլում ոչ մի բան բացառել պետք չէ, բայց շշուկների մակարդակով այս խոսակցությունները որպես իրական տարբերակ ներկայացնելն էլ անհասկանալի է:
Նախ` Մխիթարյանը հիմա վնասվածք ունի (ցանկանանք հայ ֆուտբոլիստին առողջություն ու վնասվածքի ապաքինում), և սա նշանակում է, որ համենայնդեպս ձմեռային տրանսֆերային պատուհանի ժամանակ հայ ֆուտբոլիստն այլ ակումբ չի տեղափոխվի: Բացի այդ, «Բարսելոնայի» գլխավոր մարզիչ Էռնեստո Վալվերդեն նշել է, որ Դենիս Սուարեսը պետք է կատալոնյան թիմին: Հետո էլ Մխիթարյանը «Արսենալում» բավականին բարձր աշխատավարձ է ստանում (շաբաթական 180 հազար ֆունտ), և քիչ ակումբներ կարող են բավարարել հայ ֆուտբոլիստի պայմանագրի այս կետը:
Նշվում է նաև, որ «Արսենալը» ուզում է ձեռք բերել Յանիկ Կորասկոյին: Այսինքն ևս մեկ հարձակողական ոճի կիսապաշտպանի: Ու եթե առաջնորդվենք «Սուարես-Մխիթարյան» տրամաբանությամբ, ուրեմն Հենրիխը շատ արագ պետք է նոր ակումբ փնտրի՞: Հայ ֆուտբոլիստը բազմաթիվ անգամ ապացուցել է, որ իր տաղանդով ու աշխատասիրությամբ կարող է մրցակցել բոլորի հետ: Իհարկե, ժամանակ է հարկավոր իր առավելությունները դրսևորելու համար:
Համենայնդեպս Մխիթարյանն «Արսենալում» է, և հիմա պարզապես իմաստ չունի խոսել այլ ակումբ տեղափոխվելու մասին: Պաշտոնական ոչ մի նման տեղեկություն չկա: Իսկ թե ով ու որտեղ է ուզում տեսնել Մխիթարյանին, դա դեռ ոչինչ նշանակում: Վերջապես Հենրիխն էլ պետք է ուզի տեղափոխվել: Իսկ նա, չեմ կարծում, որ հիմա մտածում է այլ ակումբում հանդես գալու մասին: