ԵՐԵՎԱՆ, 10 հունվարի — Sputnik. Հայաստանի քաղաքացին մահացել է Մոսկվայում բնակարանի վերանորոգման ժամանակ տեղի ունեցած դժբախտ պատահարի հետևանքով, հայտնում է «Մոսկովսկի կոմսոմոլեցը»։
Միջադեպը տեղի է ունեցել հունվարի 9-ին։ Ամուսնական զույգը եղբոր տան բնակարանի վերանորոգման համար դիմել է իրենց ծանոթին, ծանոթը Սոխի անունով 68-ամյա ՀՀ քաղաքացին էր։
Տղամարդն օրեր առաջ Մոսկվա էր ժամանել և գործը պետք է սկսեր լոգարանի սալիկները շարելուց։ Աշխատանքներն իրականացնելուն խանգարել է սրբիչները չորացնելու սարքը, որը միացնելու համար հատուկ սանտեխնիկ էին հրավիրել։ Սոխին ասել է, որ ինքնուրույն կլուծի հարցը։
Ավելի ուշ տանտիրուհին բնակարանում հայտնաբերել է շինարարի դին։ Երբ նրանք մտել են լողասենյակ, լոգարանում տեսել են հորատիչը ձեռքին պառկած բանվորին, իսկ խողովակից եռման ջուր էր հոսում ։
Զանգով ժամանած սանտեխնիկները հայտնաբերել են, որ պատի (որով տաք ջուր է մտնում սրբիչ չորացնելու սարքի մեջ) ներսում խողովակը վնասված է։ Հավանաբար, Սոխին այն վնասել է հորատիչով, նրա վրա եռման ջուր է լցվել. նա ընկել է լոգարանի մեջ և մահացել կա՛մ այրվածքներից, կա՛մ հոսանքահարվելուց, կա՛մ ընկնելու ժամանակ ստացած հարվածից։