ԵՐԵՎԱՆ, 9 հունվարի — Sputnik. Թուրքիայի կառավարությունում ողջունել են ստամբուլահայերի` «Լույս» հեռուստաալիքի առցանց հեռարձակման նախաձեռնությունը։ Sputnik Արմենիայի հետ զրույցում այս մասին ասաց հեռուստաալիքի հիմնադիր, գլխավոր խմբագիր, ազգությամբ հայ Շահնուր Ղազանչին։
Առաջին եթերը հաջող է անցել։ Հեռուստատեսությունը մեկ ամսից աշխատանքային լիարժեք ռեժիմի կանցնի։
Ղազանչին ավարտել է Ստամբուլի համալսարանի հեռուստատեսության ու ռադիոհեռարձակման ֆակուլտետը և երազել է Ստամբուլում հայկական հեռուստաընկերություն բացելու մասին։ Հիմա արդեն Թուրքիայի հայերը կարող են մայրենի լեզվով նորություններ լսել ու դիտել։
«Միշտ մտածել եմ, որ դա անհնար է իրականացնել։ Սկզբում ընկերներով հիմնեցինք «Լույս» թերթը, որը մեծ տարածում գտավ թուրքահայերի շրջանում, բոլորի տներում կարդում էին», – ասաց Ղազանչին։
Ավելի ուշ ընկերների հետ որոշեցին հայալեզու ռադիոկայան հիմնել, հետո կանգ առան հեռուստաընկերության վրա։ Սկզբում նրանց թվում էր, որ Թուրքիայում շատ դժվար կլինի հայալեզու հեռարձակում իրականացնել, բայց պարզվեց, որ Անկարան դեմ չէր Ղազանչիի ու նրա ընկերների նախաձեռնությանը։
«Մեզ տվեցին նույն իրավունքները, որ ունեն Թուրքիայում գործող մյուս ԶԼՄ–ները։ Պայմանավորվածություն ձեռք բերելուց հետո մենք գործարկեցինք առցանց հեռարձակումը։ Հունվարի 6–ին առաջին եթերն էր, Ստամբուլի հայկական եկեղեցուց հեռարձակում էինք Սուրբ ծնունդին նվիրված պատարագը։ Աշխարհի 21 երկրի 16 հազար օգտատեր էր մեր եթերը նայում»,– ասաց Ղազանչին։
Յուրաքանչյուր օր ժամը 8:00–ին, 12:00–ին և 19:00–ին հեռուստաալիքով կհեռարձակվի նորությունների բլոկը` հայերեն և թուրքերեն։ Հեռուստաալիքի թղթակիցները կլուսաբանեն նաև հայ համայնքի համար կարևոր իրադարձություններն ու այլ միջոցառումներ։
ХХ դարի 50-ականներին 1.5 միլիոնանոց Ստամբուլում 150 հազար հայ կար։ Այսօր գրեթե 20 միլիոնանոց Ստամբուլում հազար հույն, 20 հազար հրեա և 55 հազար հայ է մնացել։
Ստամբուլից բացի, 100–150 հայ կա Մուսալեռան մոտակայքի գյուղերում, հիմնականում` տարեցներ։