ԵՐԵՎԱՆ, 9 հունվարի — Sputnik. Հայ խիզախ նորակոչիկը ՀՀ ՊՆ պաշտոնակատարին խնդրում է իրեն առաջնագիծ տանել։ Հուզիչ այս պատմությունը` լուսանկարով, ֆեյսբուքյան իր էջում հրապարակել է ՀՀ ՊՆ մամուլի խոսնակ Արծրուն Հովհաննիսյանը։
«Շատ սիրուն նկար շատ` հուզիչ պատմությամբ»,–նկարը վերնագրել է Հովհաննիսյանը։:
Ապա նա ներկայացրել է պատմությունը:
«Զինվորը կամավոր խնդրել է առաջնագիծ գնալ: Ծնողը նախարարին խնդրում էր` թե բա երեխան խնդիրներ ունի, գոնե լրացուցիչ զննություն արեք: Նախարարը հանձնարարեց, որ լրացուցիչ ստուգեն, զինվորը արցունքները աչքերին հորն ասում է. «Ինձ հինգ ընկերոջս մոտ խայտառակ ես անում, հինգով իրար հետ կամավոր գնում ենք առաջնագիծ, դու ինձ հիվանդ ես հանում»,–գրել է Հովհաննիսյանը։
Հիշեցնենք, որ երեկ` հունվարի 8–ին, Հայաստանում մեկնարկել է ձմեռային զորակոչը։