ԵՐԵՎԱՆ, 8 հունվարի — Sputnik. Ավստրալիան կքննի 18–ամյա Ռախավա Ալկանունին ապաստան տրամադրելու հարցը։ Նա փախել է Սաուդյան Արաբիայից ու չորս օր անցկացրել է Բանգկոկի օդանավակայանում։ Այս մասին հայտնում է ՌԻԱ Նովոստին։
Երեքշաբթի առավոտյան ՄԱԿ-ի փախստականների հարցերով գերագույն հանձնակատարի գրասենյակի բանգկոկյան ներկայացուցչության աշխատակիցները հանել են աղջկան, որը գրեթե չորս օր անցկացրել է չեզոք գոտում ` օդանավակայանի շենքում։ Թայլանդի իշխանությունը թույլ է տվել նրան հինգ օր մնալ երկրում։ Այդ ընթացքում ՄԱԿ–ի աշխատակիցները պետք է գտնեն մի երկիր, որը պատրաստ կլինի փախած աղջկան մշտական կացարան տրամադրել։
Ալկանունը սոցցանցում իր փախուստի ու դրա պատճառների պատմությունն է հրապարակել։ Աղջիկը հայտնել է, որ որոշել է փախչել Սաուդյան Արաբիայից, քանի որ ընտանիքը փորձում էր իր կամքին հակառակ ամուսնացնել նրան։ Նրա խոսքով` հայրենիքում նրան բանտ է սպասում, իսկ հետո բարեկամները կսպանեն իրեն` ընտանիքի պատիվը գետնով տալու համար։
«Մարդասիրական վիզայի համար տիկին Ալկանունի դիմումը մանրակրկիտ կքննվի այն բանից հետո, երբ ՄԱԿ-ի փախստականների հարցերով գերագույն հանձնակատարի գրասենյակը կավարտի նրա պաշտպանության մասին միջնորդագրի քննման գործընթացը», – հեռուստաալիքի հետ զրույցում ասել է Ավստրալիայի ներքին գործերի դեպարտամենտի ներկայացուցիչը։
Թայլանդում ՄԱԿ-ի փախստականների հարցերով գերագույն հանձնակատարի գրասենյակի ներկայացուցիչ Ջուզեպե դե Վինսենտիսը (Giuseppe de Vincentiis) ասել է, որ Ռախավ Ալկանունի գործի քննումը կարող է մի քանի օր տևել։ Նա շնորհակալություն է հայտնել Թայլանդի իշխանությանը, որ աղջկան չեն արտաքսել Սաուդյան Արաբիա։
Նման իրարանցում էր տեղի ունեցել ԱՄԷ–ի 32–ամյա արքայադուստր Լատիֆայի հետ, որը իրավապաշտպանների տվյալներով, փորձել էր երկիր մտնել ու ձերբակալվել էր։ Արքայադստեր ընկերները հայտնել են, որ նա փորձել է «փախչել ընտանիքի պարտադրած սահմանափակումներից»։
Իրավապաշտպաններն ասում էին, որ արքայադստեր ծանոթի խոսքով, 2002 թվականին նա արդեն փորձել է Օման փախչել, բայց ԱՄԷ–ի իշխանությունները կանգնեցրել են նրան սահմանին ու «երեք տարի ազատազրկման մեջ են պահել»։ ԱՄԷ–ի իշխանությունը հերքել է տեղեկությունն այն մասին, որ արքայադստերը բռնի ուժով են պահել։