ԵՐԵՎԱՆ, 3 հունվարի – Sputnik. Լոնդոնի «Արսենալի» ու Ադրբեջանը ներկայացնող «Ղարաբաղի» միջև Եվրոպայի լիգայի խմբային մրցաշարի վերջին տուրի հանդիպման ժամանակ Արցախի դրոշով դաշտ ներխուժած երկրպագուն ժամանել է Հայաստան: Facebook սոցիալական ցանցի իր էջում այս մասին հայտնել է ՖԱՖ շարժման հիմնադիրներից մեկը` Սերգեյ Ջանջոյանը:
«Արժանի ընդունելություն մեր տղուն։ Վերջին տասնամյակների մեջ առաջին անգամ Սպարտակը Հայաստանում է»,– գրել է նա։
Հիշեցնենք` Լոնդոնի «Արսենալ» ակումբի և ադրբեջանական «Ղարաբաղ» ակումբի խաղի ժամանակ հայ երկրպագուն խաղադաշտ էր մտել արցախյան պատերազմի ազգային հերոս Մոնթե Մելքոնյանի պատկերով շապիկը հագին, իսկ ձեռքին` Արցախի դրոշը։ Ըստ տեղեկությունների` Սպարտակն ապրում է Բելգիայում։
Եվրոպա լիգայի խմբային փուլի վերջին տուրում Լոնդոնի «Արսենալը» դեկտեմբերի 13-ին սեփական հարկի տակ ընդունել էր ադրբեջանական «Ղարաբաղին»։ Հայաստանի հավաքականի ավագ Հենրիխ Մխիթարյանն այս խաղի ժամանակ խաղադաշտ դուրս չէր եկել։
Խաղն ավարտվել էր ադրբեջանական թիմի պարտությամբ։ Բացի այդ, «Ղարաբաղը» զրկվել էր Եվրոպայի լիգայի հետագա խաղերին մասնակցելու հնարավորությունից։