ԵՐԵՎԱՆ, 2 հունվարի — Sputnik. Հունվարի 1-ի ընթացքում ճանապարհային ոստիկանները վարչական պատասխանատվության են ենթարկել ոչ սթափ վիճակում մեքենա վարած 33 վարորդի: Այս մասին Facebook-ի իր էջում տեղեկացրել է Ոստիկանության հասարակայնության հետ կապերի և լրատվության վարչության լրատվամիջոցների հետ կապերի բաժնի պետ Էդգար Ջանոյանը: Նա հավելում է, որ տվյալ տրանսպորտային միջոցները տեղափոխվել են հատուկ պահպանվող տարածք։
«ՀՀ ոստիկանությունը տարեմուտին տեղեկացրել ու զգուշացրել էր, որ ոչ սթափ վիճակում մեքենա վարող ոչ մի վարորդի նկատմամբ ներողամտություն չի լինելու։
2019 թ․ հունվարի 1-ին՝ ամբողջ օրվա ընթացքում ճանապարհային ոստիկանները վարչական պատասխանատվության են ենթարկել ոչ սթափ վիճակում մեքենա վարած 33 վարորդի, որոնց տրանսպորտային միջոցները տեղափոխվել են հատուկ պահպանվող տարածք»,- գրել է Ջանոյանը։
Նա ևս մեկ անգամ Ոստիկանության անունից հորդորում է խստագույնս պահպանել երթեւեկության կանոնները։