Արմենուհի Մխոյան, Sputnik Արմենիա
Գյումրեցի քանդակագործ Մարիամ Սիմոնյանի «Երգչախումբ» արձանախումբը մի օր նրան ոսկե մեդալակիր դարձրեց։ Այնինչ նա ստեղծագործել սկսել էր միայն 25 տարեկանում։ Տիկին Մարիամը մասնագիտությամբ բանասեր է, իսկ արվեստում` ինքնուս: Ստեղծագործել սկսել է, երբ արդեն ընտանիք էր կազմել ու ծնվել էր նրա առաջնեկը՝ Կարենը:
Անկեղծանում է. «Ամուսնուս մի օր ասացի՝ ուզում եմ քանդակել, չհավատաց, կարծեց` կատակ եմ անում, բայց երբ տեսավ, թե ինչ գործեր եմ ստանում, նախ զարմացավ, ապա սկսեց ինձ օգնել գործիքներ պատրաստել»,-նշում է կինը: Ստեղծագործելու հագուրդը կնոջ մեջ այնքան մեծ է եղել, որ նույնիսկ 1 օրվա մեջ 2 քանդակ է արել: «Երբ ամուսինս այդ օրը տուն մտավ ու տեսավ 2 քանդակ ,անկեղծացավ՝ չես պատկերացնում ինչ հաճույք է, երբ տուն եմ մտնում ու այս գործերը տեսնում եմ»:
Ընտանիքում արվեստագետներ չեն ունեցել: «Մայրիկս շնորհալի էր խոհանոցում, նաև հմուտ դերձակ էր, բայց արվեստի հետ կապ չի ունեցել: Ոչ մի բան սկզբում չգիտեի, բայց անընդհատ ուզում էի քանդակել»: Այդպես՝ մեկը մյուսի հետևից ծնվում էին գործերը: Երբ սկսում էր, նույնիսկ պատկերացնել չէր կարող, որ կգա ժամանակը, ու իր «Երգչախումբ» արձանախմբի համար ոսկե մեդալ կստանա Մոսկվայում կայացած մրցույթի ժամանակ՝ 1981 թվականին:
66-ամյա ստեղծագործողի համար արվեստի գործի է վերածվում ամեն ինչ՝ կարտոֆիլի պարկից մինչև ամուսնու փոխկապը, երեխաների մանկական հագուստները, պիոներական վզկապները, տնամերձում աճեցրած դդմիկները և այլն: Հատկապես երեխաների հագուստներից պատրաստված գործերը մեծ զգուշությամբ է կինը ցուցադրում:
Ժամանակի ընթացքում մեծ ցանկություն է առաջացել ներկայացնել հայկական տարազները: Երկար մտածելուց հետո որոշել է տարազները պատկերել փայտի վրա: Հիմա արդեն շատ տարբեր տարազային փայտե տիկնիկներ ունի: Երբեմն դրանք վաճառում է: Ասում է՝ շատ են արտասահմանից եկած հյուրերը ովքեր հենց այս տիկնիկներն են ցանկանում ձեռք բերել:
«Իմ մեջ հիմա այնքան շատ են մտահղացումները, միայն ժամանակ է պետք իրականացնելու ու ստեղծագործելու համար: Ես երբեք մեկ աշխատանք չեմ անում, այլ շարքերով՝ ծառերի, համբարձման, Գյումրուն նվիրված շարք: Գյումրին հատուկ եմ սիրում: Գժվում եմ այս քաղաքի համար»,- նշում է տիկին Մարիամը:
Գործերը բազմաժանր են՝ գեղանկարչությունից մինչև քանդակ, փայտից մինչև կտոր: Ժանրային առումով ազատ է , սակայն գործերից առանձնացնում է այն, ինչը մյուս երկրներում չկա ՝ տեքստիլային կոլաժ, որը հիմնականում պատրաստում է պարկերով ու տարբեր կտորներով: Տեքստիլային կոլաժներից էլ առանձնացնում է ծառերի շարքը՝ ավելի քան 20 գործով: