ԵՐԵՎԱՆ, 28 դեկտեմբերի – Sputnik. ՀՀ վարչապետի պաշտոնակատար Նիկոլ Փաշինյանը Հայաստան հասնող ռուսական գազի գնի հարցում լավատեսորեն է տրամադրված։ Facebook սոցիալական ցանցի ուղիղ եթերում նա պատմել է ՌԴ նախագահ Վլադիմիր Պուտինի հետ հանդիպման մանրամասները։
«Գազի վերաբերյալ որոշում չկա, բայց քննարկումները շարունակվում են։ Իհարկե, հանդիպման ժամանակ նշվեց, որ սա երկու կողմի համար էլ զգայուն թեմա է, բայց ես լավատեսորեն եմ տրամադրված այդ հարցում և հույս ունեմ, որ մեզ համար ցանկալի արդյունք կլինի կամ առնվազն անցանկալի հետևանքներ չեն լինի»,– ասաց նա։
Փաշինյանը տեղեկացրեց, որ Պուտինի հետ քննարկել են հարաբերությունների շատ լայն շրջանակ։
«Խոսակցությունը հիմնականում վերաբերում էր մեր հարաբերությունների զարգացման հետագա ռազմավարությանը, և կարող եմ արձանագրել, որ ըստ էության այդտեղ մենք ունենք լիակատար ըմբռնում, թե ռազմավարական ինչպիսի ուղղություն պետք է ունենա մեր երկու երկրների հարաբերությունների զարգացումը»,- ասաց Փաշինյանը՝ նշելով, որ մեծ հաշվով այդ քննարկումը մինչև այժմ եղած քննարկումների ամփոփումն էր։
«Ընդհանուր առմամբ պետք է ասեմ, որ հանդիպման մթնոլորտը շատ դրական էր, և դուք երևի տեսաք, որ հենց հանդիպման սկզբում էլ ես անդրադարձա նրան, որ մեր հանդիպումները ՌԴ նախագահի հետ բավականին հաճախ են տեղի ունենում, և դա խոսում է մեր հարաբերությունների առանձնահատուկ և ռազմավարական բնույթի վերաբերյալ»։
Փաշինյանը հայտնեց, որ Ղարաբաղի հարցի կարգավորման վերաբերյալ որևէ քննարկում չեն ունեցել, բայց կարճ քննարկել են ՀԱՊԿ-ում ստեղծված իրավիճակը․ «Մեր դիրքորոշումն այն է, որ այստեղ մեզ հարկավոր են ինստիտուցիոնալ լուծումներ, որպեսզի ՀԱՊԿ կանոնադրության մեջ տեղի ունենան այնպիսի ուղղումներ, որոնք այս իրավիճակը չի նախատեսում, հետագայի համար նախատեսենք կոնկրետ իրավիճակներ, որպեսզի այսպիսի բանավեճեր չկանոնակարգվածության վերաբերյալ տեղի չունենան»։
Հիշեցնենք, որ Փաշինյան Պուտին հանիպումը կայացել է երեկ` դեկտեմբերի 27-ին։