ԵՐԵՎԱՆ, 27 դեկտեմբերի — Sputnik. Եթե երգիչներն ու երգչուհիները չեն ցանկանում հայտարարագրել իրենց եկամուտները, թող չհայտարարագրեն, կառավարության այսօրվա նիստի ավարտին ասաց ՀՀ պետեկամուտների կոմիտեի ղեկավար Դավիթ Անանյանը։
Ավելի վաղ Հայաստանի շոու բիզնեսի որոշ հայտնի գործիչներ դժգոհել էին հարկայինի` իրենց եկամուտների հայտարարագրման պահանջից։ Իսկ ոմանք արդեն հայտարարել են, որ հարկային ծառայությունը չի կարող հետևել, թե որքան են աստղերը ստանում երեկույթների և հարսանիքների ժամանակ։
Հարկային ծառայության ղեկավարը արձագանքել է այս հայտարարություններին` ընդգծելով, որ գներից գերատեսչությունում քաջատեղյակ են։ Անանյանը ցավով նշեց, որ շոու բիզնեսի ներկայացուցիչների հետ երկխոսություն հաստատել չի հաջողվել, և խոսակցությունը «նման ճանապարհով է» գնացել։
«Ինչո՞ւ են նրանք մտածում, թե իրենց որևէ մեկը պետք է վերահսկի։ Իսկ իրենք իրենց չե՞ն կարող վերահսկել։ Պետությունն ինչպե՞ս է պահվում` բանակը, ոստիկանությունը, մնացածը։ Միթե՞ մեր հարկերից չեն։ Մենք ուզում ենք, որ քաղաքացիները հասկանան դա, և մեզ հետ միասին աջակցեն մեր երկրին։ Դա վերաբերում է նաև հարգելի երգիչներին և երգչուհիներին։ Ինչ է նշանակում, թե ինչպես են մեզ վերահսկելու։ Ուզում եք խաբել պետությա՞նը` խաբեք», – ասաց Անանյանը։
Նշենք, որ ավելի վաղ ՊԵԿ ղեկավարն ասել էր, որ դասական կոմպոզիտորները (օրինակ, Տիգրան Մանսուրյանը) կանոնավոր կերպով հարկային հայտարարագրեր են կազմում և հարկ վճարում։
ՊԵԿ–ը բազմիցս դիմել է շոու բիզնեսի ներկայացուցիչներին` խնդրելով հաշվառման կանգնել հարկային մարմիններում, հայտարարագրել եկամուտները և բարեխիղճ հարկ վճարող դառնալ` միևնույն ժամանակ հիշեցնելով, որ ապօրինի ձեռնարկատիրական գործունեությունը քրեական պատասխանատվություն է նախատեսում։