ԵՐԵՎԱՆ, 24 դեկտեմբերի — Sputnik. Վաշինգտոնը շուտով կսկսի Հայաստանի վրա ճնշում գործադրել Արցախի հարցով զիջումներ անելու հարցով։ Այսօր հրավիրված ասուլիսի ժամանակ այս մասին ասաց ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը:
Նրա խոսքով` Հայաստանի ներքին զարգացումները թույլ տվեցին Ադրբեջանի հետ այլ կերպ բանակցել։
«Հայաստանն արդեն չի խոսում Վիեննայում և Սանկտ Պետերբուրգում ձեռք բերված պայմանավորվածությունների իրականացման մասին, քանի որ երկրի վարչապետը Ադրբեջանի նախագահի հետ պայմանավորվել է հրադադարի ռեժիմի խախտումները նվազեցնելու մասին», – ասաց Մանոյանը։
Նրա խոսքով` հրադադարի ռեժիմի պահպանման վերահսկողությունը պետք է ուժեղացվեր սարքավորումների տեղադրման և ԵԱՀԿ գործող ղեկավարի անձնական ներկայացուցչի գրասենյակի ընդլայնման ճանապարհով։
Ըստ Մանոյանի` Ադրբեջանն ապագայում կարող է մեծացնել հրադադարի ռեժիմի խախտումների հաճախականությունը, նույնիսկ կարող է փորձել ապրիլյան դեպքերի նման քայլեր ձեռնարկել։
«Այդ դեպքում վերահսկողությունը շատ թույլ կլինի, դժվար կլինի հասկանալ, թե ով է խախտել հրադադարի ռեժիմը», – նշեց Մանոյանը։
Նա կարծում է, որ Հայաստանի վրա մոտ ապագայում կսկսեն ճնշումներ գործադրել, մասնավորապես` ԱՄՆ–ն։ Երևանից զիջումներ կպահանջեն Արցախի հարցով։
«Դա չի նշանակում, որ Հայաստանը տեղի կտա այդ ճնշումներին, բայց ճնշումներ կլինեն», – ասաց Մանոյանը։
Նրա կարծիքով` առանց Վիեննայում և Սանկտ Պետերբուրգում ձեռք բերված պայմանավորվածությունների իրականացման, անմիջապես հակամարտության լուծմանն անցում կատարելը Հայաստանի համար վտանգավոր է։
Նշենք, որ 2016 թվականի ապրիլյան քառօրյայից հետո Վիեննայում, Սանկտ Պետերբուրգում և Ժնևում Հայաստանի ու Ադրբեջանի ղեկավարության հանդիպումների ժամանակ բանակցային սեղանին դրված էին մեխանիզմներ, որոնք նպաստում էին շփման գծում լարվածության նվազմանն ու ղարաբաղյան հակամարտության գոտում միջադեպերի հետաքննությանը։
Սեպտեմբերի 28-ին Փաշինյանը հայտնեց, որ Դուշանբեում ԱՊՀ գագաթնաժողովի շրջանակում Ադրբեջանի նախագահ Իլհամ Ալիևի հետ զրույցի ժամանակ նրա հետ պայմանավորվել է խաղաղություն պահպանել սահմանին, ինչպես նաև հավատարիմ մնալ երկխոսությանն ու բանակցություններին։