ԵՐԵՎԱՆ, 22 դեկտեմբերի — Sputnik. Երևանում թռչունների զանգվածային անկում չկա, թռչնագրիպի վարակի վարկածն էլ չի հիմնավորվել։ Sputnik Արմենիայի հետ զրույցում այս մասին ասաց Սննդի անվտանգության տեսչական մարմնի տեղեկատվության և հասարակայնության հետ կապերի բաժնի պետ Անուշ Հարությունյանը։
«Իրականում թռչունների զանգվածային անկում չի եղել։ Շատերը հավանաբար նույն թռչունների մասին էին ահազանգում սոցցանցերում։ Խնդիրն իրականում երևի 10-20 սատկած թռչունների մասին էր։ Դրանցից 6-7-ը բերվել էր փորձաքննության։ Թե՛ ախտաբանաանատոմիական փորձաքննություն է արվել, այսինքն`դիահերձում, թե՛ փորձ է արվել որոշել` արդյոք հիվանդություն կա, թե ոչ։ Բոլոր նմուշերում հայտնաբերվել են խորը, թափանցող մեխանիկական վնասվածքներ, որոշների մոտ եղել են գանգի, պարանոցի, ողերի կոտրվածքներ, կտուցից արյունահոսություն, ինչը նշանակում է, որ վնասվածքները մեխանիկական են։ Իհարկե, դրանով չենք բավարարվել, քանի որ այդ վնասվածքները կարող էին առաջանալ նաև անկումների պատճառով»,– ասաց Հարությունյանը։
Թռչնագրիպի առկայությունը բացառելու նպատակով կատարվել է նաև թռչնագրիպի հետազոտություն, որի արդյունքում բացառվել է թռչնի գրիպը առկայությունը
Տեսչական մարմինը հայտարարում է, որ Հայաստանում այս պահին թռչնի գրիպը բացառվում է։
Ինչ վերաբերում է թռչունների սատկելու իրական պատճառներին ու նրանց մոտ հայտնաբերված վնասվածքներին, տեսչությունը դրանց վերաբերյալ առայժմ հստակ պատճառաբանություն չունի։ Մեր զրուցակիցը, սակայն, չի բացառում, որ դա կարող է լինել մարդկանց ձեռքի գործը։
«Չի կարող լինել այնպես, որ թռչունների շրջանում վարակի զոհ դառնան միայն մեծ թռչունները` ագռավները։ Իսկ ճնճղուկների, տնային թռչունների անկման որևէ դեպք չի գրանցվել։ Ակնհայտ է, որ դա հարվածի արդյունք է։ Մեծ թռչնին հարվածը դիպչում է, փոքրին` ոչ»,– ասաց Հարությունյանը։
Մեկ այլ վարկած են նաև տոնական հրավառություններն ու ճայթուկները, որոնք չի բացառվում` երեխաները թռչուններին ուղղեն։
Այնուամենայնիվ, հետազոտական աշխատանքները շարունակվում են: Շարունակվում են նաև սոցիալական ցանցերում ու Սննդամթերքի անվտանգության տեսչական մարմնում ստացվող նոր դեպքերի մասին ահազանգերը։
Հիշեցնենք` Երևանի փողոցներում սատկած թռչուններ էին հայտնաբերվել, որոնք օրեր առաջ ներկայացվել էին լաբորատոր փորձաքննության։
Մինչ այդ սոցիալական կայքերում ահազանգեր էին հնչել Օպերայի ու Սևանի փողոցի հարակից տարածքներում սատկած թռչունների հայտնաբերման մասին։
Բնապահպանները չէին բացառել, որ դա պայմանավորված է թռչնագրիպով կամ կենդանական այլ վարակով։