ԵՐԵՎԱՆ, 21 Դեկտեմբեր — Sputnik. Հավաքական անվտանգության պայմանագրի կազմակերպության (ՀԱՊԿ) նոր գլխավոր քարտուղարի նշանակման փաստաթուղթը պետք է ստորագրվի կառույցի անդամ բոլոր երկրների կողմից, դրա ժամկետները հստակեցված չեն։ Այս մասին ՌԻԱ Նովոստին ասել է ՀԱՊԿ քարտուղարության մամուլի խոսնակ Վլադիմիր Զայնետդինովը:
«ՀԱՊԿ անդամ 6 պետությունների ղեկավարները պետք է ստորագրեն որոշումը: Գլխավոր քարտուղարը նշանակվում է կոնսենսուսով, 6 ղեկավարների կողմից», - շեշտել է Զայնետդինովը:
Նրա խոսքով` իրենք բացի Բելառուսի նախագահ Ալեքսանդր Լուկաշենկոյից ՀԱՊԿ անդամ մեկ այլ երկրի ղեկավարի` որոշումը ստորագրելու մասին ինֆորմացիա չունեն:
Ինչպես արդեն տեղեկացրել ենք`Բելառուսի նախագահ Ալեքսանդր Լուկաշենկոն ստորագրել է ՀԱՊԿ գլխավոր քարտուղարի պաշտոնում Բելառուսի ներկայացուցիչ Ստանիսլավ Զասի նշանակման մասին Հավաքական անվտանգության խորհրդի որոշման նախագիծը:
Ստանիսլավ Զասը Հայաստան դեռ չի այցելել, բայց արդեն խոսել է նման մտադրություն մասին:
Հիշեցնենք, որ Հայաստանը Մարտի 1–ի գործի շրջանակում Յուրի Խաչատուրովին հետ է կանչել Հավաքական անվտանգության պայմանագրի կազմակերպության գլխավոր քարտուղարի պաշտոնից: