ԵՐԵՎԱՆ, 18 դեկտեմբերի — Sputnik. Ռուսաստանի մարզերի հետ համագործակցությունը կխթանի Հայաստան զբոսաշրջիկների հոսքը։ Այս մասին այսօր հրավիրված մամուլի ասուլիսին ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։
«Կարծում եմ`սա միջտարածաշրջանային համագործակցության կարևոր ոլորտներից մեկն է», – ասաց Կոպիրկինը։
Նրա խոսքով` կարելի է փոխշահավետ համագործակցել Հայաստանի հանգստավայրերն օգտագործելու համար։
«Մարզերի բնակիչների, ձեռնարկությունների և ընկերությունների աշխատակիցների կարելի է ուղարկել այստեղ։ Կարելի է համատեղ հոսք կազմակերպել։ Եվ սա արդեն պետք է լինի մարզերի միջև պայմանավորվածությունների մակարդակով», – նշեց Կոպիրկինը։
Նա կարծում է, որ համապատասխան ռեսուրսներ կան, բայց այդ ուղղությամբ աշխատել է պետք։
OZON.travel թրևլ–գործակալության տվյալներով` Հայաստանը ռուսաստանցիների համար Ամանորի տոներին ամենամեծ պահանջարկը վայելող զբոսաշրջային ուղղությունից մեկն է։