ԵՐԵՎԱՆ, 17 դեկտեմբերի — Sputnik. Վերջին տարիներին հայաստանյան աշխատաշուկայում զգալիորեն ավելացել են ասիական երկրներից աշխատանքային միգրանտները։
Տնտեսագետ Սուրեն Պարսամյանի տեղեկություններով` նրանց թիվը շուրջ 25 000–ի է հասնում, ինչը Հայաստանի աշխատանքային շուկայի համար լուրջ թիվ է։
«Դա հիմնականում պայմանավորված է մեր միգրացիոն օրենսդրության չափազանց մեղմ լինելով։ Հայաստան շատ հեշտ է մուտք գործել, օդանավակայանում ստանալ մուտքի վիզա: Ապա` աշխատանքի համար անհրաժեշտ է փաստաթղթեր ներկայացնել ոստիկանություն, ստանալ կեցության 10 տարվա իրավունք, ինչը ոստիկանությունը շատ հեշտությամբ է տրամադրում։ Մեր օրենսդրությունը, օրինակ, ի տարբերություն ՌԴ–ի որևէ սահմանափակում չունի աշխատանքի ոլորտում»,– ասաց Պարսամյանը։
Նրա խոսքով` Հայաստանը նաև միջանկյալ հանգրվան է որոշ միգրանտների համար` դեպի Եվրոպա ճանապարհին։
Պարսամյանի համոզմամբ, այս խնդիրը կարգավորման կարիք ունի, ինչը կառավարությունը պետք է սկսի վիճակագրության ուսումնասիրությունից ու վիճակի գնահատականից։
Այսօր, տնտեսագետի գնահատմամբ, արտասահմանցիները Հայաստանի աշխատաշուկայում շուրջ 5 տոկոս են կազմում, ինչը գործազրկության բարձր մակարդակ ունեցող երկրի համար լուրջ խնդիր է։
«Այս պահին այլազգիների ներկայությունը դեռ շատ բացասական հետևանքների չի հանգեցրել, բայց տենդենցը շարունակվելու դեպքում, կարող է հանգեցնել։ Եթե արդեն ամեն ամիս 10-20 տոկոս աճ է նկատվում, ապա այս ցուցանիշով մենք 3-4 տարի անց կունենանք 100 000 և ավելի աշխատանքային միգրանտ Հայաստանում»,– ասաց նա։
Սուրեն Պարսամյանի տեղեկություններով ` Հայաստան աշխատելու են գալիս հիմնականում Հնդկաստանից և Ֆիլիպիններից։ Գործատուները գերադասում են օտարազգիներին ընդունել աշխատանքի ու վճարել ավելի քիչ, քան նույն գործի դիմաց ՀՀ քաղաքացիներին վճարել բարձր աշխատավարձ։ Այս մրցակցության հետևանքով էլ ՀՀ քաղաքացին դուրս է մնում աշխատաշուկայից։
Մյուս կողմից ասիացիների հոսքը դեպի Հայաստան նաև նոր բիզնեսի տեսակ է դարձել։ Ըստ Պարսամյանի` այսօր Հայաստանում ու Հնդկաստանում գործում են հատուկ գրասենյակներ, ովքեր փաստաթղթային ձևակերպումների ու աշխատանք գտնելու աջակցություն են տրամադրում Հայաստանում աշխատել ցանկացող այլազգիներին։