ԵՐԵՎԱՆ, 17 դեկտեմբերի — Sputnik. 23-ամյա երիտասարդին առևանգելու կասկածանքով ձերբակալել են չորս անձանց: Այս մասին հայտնում է ՀՀ քննչական կոմիտեն` ներկայացնելով օրեր առաջ Երևանում տեղի ունեցած առևանգման դեպքի մանրամասները։
2018 թվականի դեկտեմբերի 15-ին՝ ժամը 15:00-ին, Երևան քաղաքի 23–ամյա բնակիչը ոստիկանության Արաբկիրի բաժնում հաղորդում է տվել, որ 2018 թվականի դեկտեմբերի 12-ին՝ ժամը 23:30-ի սահմանում, իրեն ծանոթ անձինք, իր կամքին հակառակ, բռնություն գործադրելով, առևանգել են իրեն՝ նստեցնելով «Մերսեդես» մակնիշի ավտոմեքենան, տեղափոխել են ինչ-որ առանձնատուն, պահել այնտեղ և ևս 8 անհայտ անձանց հետ ծեծի ենթարկել:
Ըստ երիտասարդի հաղորդման՝ ներկաներից մեկն ատրճանակով, մյուսը` դանակով սպանության սպառնալիքներ են տվել, հայհոյել, դանակով վնասել աջ ձեռքի դաստակը:
Դեպքի առթիվ 2018 թվականի դեկտեմբերի 15-ին ՀՀ ոստիկանության ԵՔՎ Արաբկիրի բաժնում հարուցվել է քրեական գործ՝ ՀՀ քրեական օրենսգրքի 131-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ մարդուն առևանգելը)։
Քննչական և օպերատիվ հետախուզական միջոցառումների արդյունքում պարզվել են դեպքի մի շարք հանգամանքներ՝ շարժառիթը, դեպքի վայրը, առերևույթ հանցագործություն կատարած անձանցից 4-ի ինքնությունը։
Թե ինչն է եղել առևանգման առիթը, քննչական մարմինը չի հայտնում։ Նշվում է միայն, որ երիտասարդին առևանգելու կասկածանքով ձերբակալվածները Երևանի բնակիչներ են:
Հիշեցնենք` մինչ այդ մամուլում տեղեկություններ էին տարածվել, որ առևանգվածը ոստիկանության պետի պաշտոնակատարի եղբորորդին է` Հովհաննես Խմելյանը, որին տարել են Քանաքեռ ՀԷԿ-ի տարածքում գտնվող առանձնատներից մեկը։
Ըստ մամուլի` առևանգողները եղել են Երևանի Ադոնցի փողոցի բնակիչներ 39-ամյա Սարգիս Մկրտչյանը, 35-ամյա Գոռ Հովհաննիսյանը, 38-ամյա Կարեն Ջումայանը և Հասրաթյան փողոցի բնակիչ, 28-ամյա Արմեն Մկրտչյանը: