ԵՐԵՎԱՆ, 16 դեկտեմբերի –Sputnik. Վրացական ընդդիմադիր «Ուժը միասնության մեջ է» միավորման համախոհները տասնյակ ավտոմեքենաներով Թբիլիսիից Թելավի են մեկնել բողոքի ակցիա անցկացնելու համար։ Հիշեցնենք, որ այսօր այնտեղ կայանալու է Վրաստանի նորընտիր նախագահ Սալոմե Զուրաբիշվիլու երդմնակալության արարողությունը։ Այս մասին հայտնում է ՌԻԱ Նովոստին։
Վրաստանի նախագահական ընտրությունների երկրորդ փուլն անցկացվել է նոյեմբերի 28-ին։ Քվեարկության արդյունքով` Զուրաբիշվիլին ստացել է ձայների 59,52%–ը, նրա մրցակից Գրիգոլ Վաշաձեն` 40,48%–ը։ Սրանք վերջին ընտրություններն էին, որոնք ուղիղ քվեարկությամբ են անցնում, ապագայում պետության ղեկավարին 300 պատվիրակներ են նշանակելու։ Նոր նախագահի լիազորության ժամկետը 6 տարի է, ոչ թե նախկինի պես` հինգ։
Նորընտիր նախագահի երդմնակալության արարողությունը տեղի կունենա Երևանի ժամանակով ժամը 15.00–ին, Թելավիում։ Ավելի վաղ ընդդիմությունը, որը չի ճանաչում ընտրությունների արդյունքները, հայտարարել է Թելավիում երդմնակալության օրը բողոքի ակցիա կազմակերպելու մասին` պահանջելով արտահերթ խորհրդարանական ընտրություններ անցկացնել։
«Մենք Թելավի ենք գնում խաղաղ ցույց անցկացնելու համար։ Բացի այդ, արտահերթ խորհրդարանական ընտրություններ նշանակելու պահանջով ակցիաներ կիրականացվեն նաև երկրի մյուս քաղաքներում», – ասել է Վաշաձեն լրագրողներին։
Վրացական հեռուստաընկերությունները հայտնում են, որ ոստիկանությունը փակել է Թելավիի հրապարակը, որտեղ ընդդիմությունը մտադիր է անցկացնել իր ցույցը։ Բացի այդ իրավապահ մարմինները փակել են Գոմբորի լեռնանցքով անցնող կարճ ճանապարհը։ Ընդդիմությունը Թելավի է գնում շրջանցիկ ճանապարհով։