ԵՐԵՎԱՆ, 15 դեկտեմբերի — Sputnik. Հայաստանի ոստիկանապետ Վալերիյ Օսիպյանը հանդիպել է ջավախահայերի խմբի հետ, որոնք նախօրեին փակել էին հայ-վրացական սահմանին գտնվող «Նինոծմինդա-Բավրա» հսկիչ անցակետը։ Sputnik Արմենիայի թղթակցի հետ զրույցում այս մասին ասաց Հայաստանի ոստիկանության մամուլի ծառայության ներկայացուցիչ էդգար Ջանոյանը։
Դեկտեմբերի 14-ին Վրաստանի Սամցխե–Ջավախքի հայաբնակ շրջանի ավելի քան 70 բնակիչներ արգելափակել են Նինոծմինդա–Բավրա հսկիչ անցակետը` բողոքելով Հայաստանում իրենց համերկրացիներին պահելու դեմ բողոքի։
Խնդիրն այն է, որ Ջավախքի 10 էթնիկ հայեր, որոնք կրկնակի քաղաքացիություն ունեն (Հայաստանի և Վրաստանի), մնացել են Հայաստանում և չեն կարող տուն հասնել Ռուսաստանից վերադառնալուց հետո։
«Օսիպյանն իսկապես հանդիպել է նրանց հետ և խոստացել մանրամասն ուսումնասիրել ոստիկանության դերը և գործողությունները այս գործում», - ասաց Ջանոյանը։
Նշենք, որ 2000–ականների կեսերին ռուս–վրացական հարաբերությունների սրացումից հետո, որի հետևանքով երկրների միջև հաստատվել է վիզային ռեժիմ, Վրաստանի շատ հայազգի քաղաքացիներ սկսել են երկրորդ քաղաքացիություն ստանալ պատմական հայրենիքում` Հայաստանում, որպեսզի Երևանով անարգել մեկնեն Ռուսաստան` արտագնա աշխատանքի։
Նախկինում հայ–վրացական սահմանը հատելիս վրացական անձնագրի հետ խնդիրներ չեն ծագել, սակայն այս անգամ մի խումբ քաղաքացիների առաջ ծառացել է Հայաստանի զինված ուժերում զինվորական ծառայություն անցած չլինելու հարցը։ Դատելով ամեն ինչից` Հայաստանում նրանց պահելը հիմնավորվում է փաստաթղթերի, ավելի ճիշտ` զինվորական գրքույկի բացակայությամբ։
Հիշեցնենք, որ անցած տարի Հայաստանի կառավարությունը որոշում է ընդունել, որի համաձայն Հայաստանի արական սեռի 18-27 տարեկան քաղաքացիները չեն կարող դուրս գալ երկրից, եթե չեն ծառայել բանակում։