ԵՐԵՎԱՆ, 14 դեկտեմբերի — Sputnik. Մինսկի խումբն այս տարիների ընթացքում ոչինչ չի արել ղարաբաղյան հակամարտության կարգավորման համար։ Այս մասին հայտարարել է Բելառուսի նախագահ Ալեքսանդր Լուկաշենկոն այսօր Մինսկում ռուսական ԶԼՄ–ների ներկայացուցիչների հետ հանդիպմանը։
Ինչպես հաղորդում է Sputnik Բելառուսը, Լուկաշենկոն համոզված է, որ հակամարտությունն անհնար է լուծել առանց Հայաստանի և Ադրբեջանի առաջնորդների միջև պայմանավորվածություն ձեռք բերելու։
«Լեռնային Ղարաբաղի հարցով Մինսկի խումբը ոչ մի բան չի արել այս տասնամյակների ընթացքում և չի անի, քանի դեռ երկու նախագահները (Հայաստանի և Ադրբեջանի` խմբ.) չնստեն և չասեն. «Եկեք լուծենք խնդիրը հօգուտ մարդկանց»», – ասել է Լուկաշենկոն։
Նշենք, որ մամուլի ասուլիսի ընթացքում Լուկաշենկոն մեկնաբանել է նաև Ադրբեջանին «Պոլոնեզ» համազարկային համակարգ վաճառելու իրավիճակը` հավաստիացնելով, որ դա ոչ մի դեպքում քայլ չէ Հայաստանի դեմ։