ԵՐԵՎԱՆ, 14 դեկտեմբերի — Sputnik. ԱԺ նախագահի տեղակալի պաշտոնը Էդուարդ Շարմազանովի համար եղել է ոչ միայն իրավունք, այլ առաջին հերթին պարտականություն և Հայաստանին ու Արցախին ծառայելու առաքելություն։ Շարմազանովն այս մասին ասաց այսօր` ԱԺ իր աշխատասենյակից Facebook սոցիալական ցանցի ուղիղ եթեր դուրս գալով։ Նա շնորհավորեց բոլոր նորընտիր պատգամավորներին` նշելով, որ մի քանի օրից 6–րդ գումարման ԱԺ–ն կդադարեցնի իր աշխատանքն ու էստաֆետը կհանձնի 7-րդ գումարման ԱԺ–ին։
«Տոկիոյից մինչև Մոսկվա, Աթենքից մինչև Բուենոս Այրես չի եղել մի հարթակ, որտեղ չբարձրաձայնեմ արցախահայության իրավունքների, Արցախի անկախության ճանաչման, ընդդեմ թուրքական ժխտողականության և Ցեղասպանության միջազգային ճանաչման անհրաժեշտության մասին»,–ասաց։
Շարմազանովն ավելացրեց, որ ամեն ինչ արել է երկրի պատիվը բարձր պահելու համար, իսկ եթե եղել են թերացումներ, ապա դրանց համար հայցում է ժողովրդի ներողամտությունը։
«Լինելով ԱԺ մեծամասնության ներկայացուցիչ` ես նախևառաջ առաջնորդվել եմ «կուսակցությանս հետ, բայց ազգիս համար» սկզբունքով։ Երբեք չեմ դարձել կուսակցամոլ, փորձել եմ սուր կետերը հղկել, փորձել եմ անել ամեն ինչ, որպեսզի քաղաքական բանավեճը չվերածվի անձնական ատելության»,– ասաց նա։
Ավարտելով ֆեյսբուքյան ուղերձը` Շարմազանովը հայտնեց, որ մնում է քաղաքականության մեջ, մնում է ՀՀԿ–ում և շարունակելու է պայքարը` հանուն և ոչ թե ընդդեմ։
«Սիրում եմ իմ երկիրը, անելու եմ ամեն ինչ, որպեսզի իմ երկրում չլինի ատելություն, չլինի սև ու սպիտակի բաժանում, Արցախը լինի ազատ, ցեղասպանության միջազգային ճանաչումն էլ լինի իրատեսական»,– ասաց նա։
Հրաժեշտ տալով իր ունկնդիրներին` Շարմազանովը բարին մաղթեց և՛ իրեն քննադատողներին, և՛ աջակիցներին`արտախորհրդարանական պայքարի խաչմերուկներում հանդիպելու ակնկալիքով։
Նշենք, որ ԿԸՀ–ի նախնական տվյալներով, ԱԺ արտահերթ ընտրության քվեարկությանը մասնակցել են 1 միլիոն 260 հազար 840 քաղաքացի կամ ընտրողների 48.63%–ը։ Հայաստանի Հանրապետական կուսակցությունը ստացել է ձայների 4.70%–ը, «Քաղաքացու որոշում» սոցիալ–դեմոկրատական կուսակցությունը` 0.68%–ը, «Հայ Յեղափոխական դաշնակցություն» կուսակցությունը` 3.89%–ը, «Իմ քայլը» դաշինքը` 70.43%–ը, «Լուսավոր Հայաստան» կուսակցությունը` 6.37%–ը, «Քրիստոնեա-ժողովրդական վերածնունդ» կուսակցությունը` 0.51%–ը, «Ազգային առաջընթաց» կուսակցությունը` 0.33%–ը, «Մենք» դաշինքը` 2. 00%–ը, «Օրինաց երկիր» կուսակցությունը` 0.99%, «Սասնա ծռեր» համահայկական կուսակցությունը` 1.82%–ը, «Բարգավաճ Հայաստան» կուսակցությունը` 8.27%–ը։