ԵՐԵՎԱՆ, 12 դեկտեմբերի — Sputnik. Այսօր՝ դեկտեմբերի 12-ին Գյումրու քաղաքապետարանի նիստերի դահլիճում մարզական ոլորտի ներկայացուցիչները, մեկնաբաններն ու մարզական լրագրողները Շիրակի մարզպետարանի և Գյումրու քաղաքապետարանի սպորտի բաժնի ղեկավարներ Վաչիկ Վարդանյանի և Մեխակ Ղազարյանի գլխավորությամբ ընտրեցին 2018թ թվականի մրցաշրջանի լավագույն մարզիկներին:
Ինչպես Sputnik Արմենիային տեղեկացրին Գյումրու քաղաքապետարանից, լավագույն մարզիկների եռյակը գլխավորում է ծանրամարտիկ, աշխարհի փոխչեմպիոն Գոռ Մինասյանը, երկրորդ տեղում Արթուր Ալեքսանյանն է (հունահռոմեական ըմբշամարտ), լավագույն եռյակը եզրափակում է Գրիգոր Մխիթարյանը (սամբո):
Ի դեպ՝ վերջիններս ընդգրկված են նաև հանրապետության լավագույն մարզիկների ցուցակում:
Հունահռոմեական ոճի ըմբիշ Կարեն Խաչատրյանը գլխավորում է պատանիների ու երիտասարդների շարքը: