Ալեքսեյ Ստեֆանով, Sputnik
Պատանի երաժիշտների «Շելկունչիկ» XIX միջազգային հեռուստամրցույթին մասնակցելու համար 12-ամյա Գուր Սարգսյանը Մոսկվա է եկել իր ուսուցչի հետ։ Տղայի ելույթին ուսուցչուհին հետևում էր հետնաբեմում և նկատելիորեն հուզվում։ Իսկ Գուրը, ժյուրիի գնահատականները լսելուց հետո, բավականին հանգիստ էր և գոհ։
«Ինձ համար մեծ պատիվ է մասնակցել «Շելկունչիկ» մրցույթին։ Եվ, իհարկե, ես հաղթանակ եմ ակնկալում», – Sputnik Արմենիայի թղթակցի հետ զրույցում հայտնեց նա։
Վստահությունը, որով Գուրը խոսում է իր նպատակի մասին, պատահական չէ. պատանի դաշնակահարը քրտնաջան աշխատում է, նա սովորում է Երևանի Ալ. Սպենդիարյանի անվան երաժշտական դպրոցում։ Երևանում անցկացվող Առնո Բաբաջանյանի անվան պատանի և երիտասարդ դաշնակահարների միջազգային մրցույթում 2015 թվականին նա 4-րդ տեղն է զբաղեցրել, 2016 թվականին Գերմանիայի Ահեն քաղաքում ClavirCologne մրցույթում առաջին մրցանակին է արժանացել, հաջորդ տարի նույն մրցույթում, այդ անգամ արդեն Թբիլիսիում անցկացվող, արժանացել է երկրորդ մրցանակին։
2018 թվականին էլ Գուրը երկու անգամ հիանալի արդյունք է ցույց տվել. դարձել Սանկտ Պետերբուրգում Լ.Ա. Բրուկի անվան դաշնամուրային դուետների մանկական մրցույթների դափնեկիր և գրան պրի ստացել Փարիզում Flame երաժշտական մրցույթում։
«Երբ փոքր էի, երեք երազանք ունեի` շատ էի ուզում դաշնամուր նվագել, ֆուտբոլիստ դառնալ և նկարել։ Սակայն մայրս որոշեց սկզբում ինձ երաժշտական դպրոց տանել։ Տեսավ, որ ինձ մոտ ամեն ինչ շատ լավ է ստացվում և չցանկացավ ֆուտբոլի կամ գեղարվեստի դպրոց տալ։ Նախկինի նման ուզում եմ ֆուտբոլիստ և նկարիչ դառնալ, սակայն մայրիկիս ոչ մի կերպ համոզել չի ստացվում։ Մեկ երազանք է մնացել. մեծ երաժիշտ դառնալ», – ասում է Գուրը։
Գուրը նաև արժանի օրինակ ունի. նրա ավագ եղբայրը, 21-ամյա Գոշը, օպերային երգիչ է, մայրը` դերասանուհի։ Միայն հայրը արվեստի հետ կապ չունի։
«Հայրս գործարար է», – ասում է տղան։
Սարգսյանների ընտանիքն ապրում է սեփական տանը, Գուրը դաշնամուր կարող է նվագել և՛ գիշերը, և՛ ցերեկը` հարևաններին չխանգարելով իրագործել իր երազանքը։
«Շելկունչիկ» մրցույթում եզրափակիչ հասնել Գուր Սարգսյանին չհաջողվեց, սակայն նա չի ընկճվել։
«Կարևորը մասնակցելն է», – ասաց պատանի դաշնակահարը հրաժեշտ տալիս։
«Շելկունչիկ» պատանի երաժիշտների XIX միջազգային հեռուստամրցույթը մեկնարկել է Մոսկվայում դեկտեմբերի 4-ին և կտևի մինչև ամսի 11-ը։ Մրցույթը պատանի երաժիշտների համար մասնագիտական հետագա կարիերայի հեռանկար է բացում. երեխաներն ընդունվում են Ռուսաստանի լավագույն երաժշտական ուսումնական հաստատություններ, հայտնի երաժիշտների աջակցությամբ մասնակցում են Ռուսաստանի և Եվրոպայի տարբեր քաղաքներում անցկացվող համերգներին, ամենահեղինակավոր երաժշտական ֆորումներին և փառատոներին։ Եզրափակիչ փուլում մասնակիցները սիմֆոնիկ նվագախմբի հետ ելույթ կունենան Չայկովսկու անվան համերգասրահում։