ԵՐԵՎԱՆ, 10 դեկտեմբերի — Sputnik. Մոլդովայի Սահմանադրական դատարանը որոշում է կայացրել ժամանակավորապես հեռացնել պաշտոնից երկրի նախագահ Իգոր Դոդոնին։ Այս մասին հայտնում է ՌԻԱ Նովոստին։
Դատարանի նախագահ Միխայ Պոալելունժը հայտնել է, որ ժամանակավոր հրաժարականը հիմնավորված է այն փաստով, որ Դոդոնը հրաժարվում է «կատարել սահմանադրական պարտականություններն» ու հավանություն տալ խորհրդարանի հաստատած օրենքներին։
Ընթացակարգն անհրաժեշտ է հինգ օրենքի հաստատման համար, որոնք պետության ղեկավարի հավանությանը չեն արժանացել։
«Սահմանադրության 91–րդ հոդվածի հիման վրա խորհրդարանի նախագահը որպես նախագահի պաշտոնակատար կստորագրի նշված օրենքները», – պարզաբանել է Սահմանադրական դատարանի ղեկավարը։
Դատարանի որոշումը վերջնական է ու ենթակա չէ բողոքարկման։
Այս տարվա ընթացքում սա արդեն պետության ղեկավարի ժամանակավոր հեռացման հինգերորդ դեպքն է։