ԵՐԵՎԱՆ, 10 դեկտեմբերի — Sputnik. Հայաստանի ԿԸՀ (Կենտրոնական ընտրական հանձնաժողով) նախագահ Տիգրան Մուկուչյանն առայժմ չի շտապում ներկայացնել քաղաքական ուժերի միջև պատգամավորների մանդատները բաշխելու ցուցանիշները։ Այս մասին նա ասաց այսօր կայացած ասուլիսի ընթացքում։
«Առայժմ չեմ կարող թվեր ներկայացնել մանդատները բաշխելու վերաբերյալ։ Հիմա վերահաշվարկ է կատարվում։ Տարածքային ընտրական հանձնաժողովները դեռ պետք է ներկայացնեն իրենց որոշումները, կարող են լինել ինչ-որ բողոքներ և դիմումներ։ ԿԸՀ–ը կամփոփի այս ամենը և հետո միայն որոշում կկայացնի ընտրությունների արդյունքների վերաբերյալ, այդ թվում` ձայները բաշխելու», – նշեց Մուկուչյանը։
Մեկնաբանելով ընտրություններում ընտրողների մասնակցության մակարդակը` ԿԸՀ–ը նախագահն ասաց, որ համաձայն չէ ընտրողների ցածր ակտիվության մասին կարծիքների հետ։
«Կեսօրից հետո զգալի ակտիվություն է նկատվել։ Առավոտյան պասիվությունը կարող էր պայմանավորված լինել եղանակային պայմաններով։ Չեմ կարծում, որ մասնակցության տոկոսը ցածր է», – նշեց նա։
Հիշեցնենք, որ ՀՀ ԱԺ անցնելու համար կուսակցությունները պետք է հավաքեին ձայների առնվազն 5 տոկոսը, դաշինքները` 7։ Օրենքով ձայների ավելի քան 50 տոկոսը հավաքած քաղաքական ուժն իրավունք ունի սահմանադրական մեծամասնություն ստանալ խորհրդարանում` տեղերի 54 տոկոսը։
Կուսակցության ներսում մանդատների կեսը ստանում են այն թեկնածուները, որոնք վարկանիշային քվեարկության արդյունքում գրանցել են ամենաբարձր ցուցանիշները։ Մնացած տեղերը բաժին են ընկնում համամասնական ցուցակի առաջին համարներին։
Հայաստանի նոր սահմանադրության համաձայն, որն ընդունվել է 2015թ–ի դեկտեմբերի 6–ին հանրաքվեի արդյունքում, խորհրդարանի անդամների ամրագրված թիվ չի նշվում, նշվում է միայն նրանց նվազագույն թիվը` 101 պատգամավոր։