ԵՐԵՎԱՆ, 9 դեկտեմբերի — Sputnik. Հանուն ազատ երջանիկ ու հզոր Հայաստանի։ Այսօր, ընտրական տեղամասից դուրս գալուց, հետո իր ընտրությունն այսպես մեկնաբանեց ՀՀ վարչապետի պաշտոնակատար, «Իմ քայլը» դաշինքի համամասնական ցուցակը գլխավորող Նիկոլ Փաշինյանը։
Նա նաև հայտնեց, որ իր տեղեկություններով ընտրության ընթացքի հետ կապված հարցեր չկան։ Իսկ վարչական ռեսուրսի կիրառման մասին հայտարարություններին այսպես արձագանքեց. «Եթե վարչական ռեսուրսի կիրառման փաստեր պարզվեն, կիրառողները կպատժվեն»։
Փաշինյանի խոսքով` ընտրությունների արդյունքը ցույց կտա, թե հետո ինչ է լինելու`կախված նրանից, թե ինչ կորոշի ՀՀ ժողովուրդը։
«Ժողովրդավարության իմաստն այն է, որ հենց ժողովուրդն է որոշում ով է լինելու իշխանության, ով է լինելու խորհրդարանում և ով` ոչ »,– ասաց նա, բայց և հավելեց` եթե հարցումներն իրականում արտահայտում են ժողովրդի տրամադրվածությունը` ընտրություններից հետո իշխանական կոալիցիա չի կազմվի։
Հիշեցնենք, որ ԱԺ ընտրությանը մասնակցում են 9 կուսակցություն, 2 դաշինք։ Ցուցակներում ընդգրկված են 1444 թեկնածու, որոնցից 12 –ը ազգային փոքրամասնությունների ներկայացուցիչներ են։
Հայաստանի ամբողջ տարածքում բացվել են 2010 ընտրատեղամասեր, դրանցից մի քանիսը` ՔԿՀ–ներում։ Իսկ այն քաղաքացիները, որոնք զրկված են տեղամաս այցելելու հնարավորությունից, իրենց ընտրությունը կկատարեն 41 շրջիկ արկղերի միջոցով։