ԵՐԵՎԱՆ, 9 դեկտեմբերի – Sputnik. Այսօր Հայաստանի Հանրապետությունում կայացած ԱԺ արտահերթ ընտրություններին «Երևան-Կենտրոն» ՔԿՀ-ից միայն Ռոբերտ Քոչարյանը չի մասնակցել քվեարկությանը։ Sputnik Արմենիային այս մասին ասաց ՀՀ արդարադատության նախարարության քրեակատարողական վարչության հանրային կապերի բաժնի պետ Նոնա Նավիկյանը։
Այս ՔԿՀ-ում ընդհանուր առմամբ գտնվում է 16 անձ, քվեարկությանը մասնակցել են 15-ը։
Քոչարյանն այժմ «Երևան-Կենտրոն» քրեակատարողական հիմնարկում է։
Նշենք, որ ըստ ԿԸՀ տվյալների` ԱԺ արտահերթ ընտրությանը ՀՀ քաղաքացիների մասնակցությունը կազմել է 48,63%: 2 միլիոն 592 հազար 486 ընտրողներից քվեարկել են 1 միլիոն 260 հազար 840-ը:
Հիշեցնենք` ՀՀ երկրորդ նախագահ Ռոբերտ Քոչարյանին կրկին կալանավորեցին երկու օր առաջ։
Նոյեմբերի 27-ից Վերաքննիչ դատարանում քննվում էր Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ նրա պաշտպանների բողոքը։ Ավելի վաղ Վճռաբեկ դատարանը նույն հիմքով բողոքի հիման վրա որոշում էր կայացրել գործն ուղարկել լրացուցիչ քննության։ Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից: Ավելի ուշ քրեական գործի նախաքննությունը վարող ՀՔԾ քննիչը որոշում է կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։