ԵՐԵՎԱՆ, 7 դեկտեմբերի — Sputnik. 1988 թվականի ավերիչ երկրաշարժը ողբերգություն էր, որը դարձավ յուրաքանչյուրինը և համախմբեց մարդկությանը «Քեզ համար, Հայաստան» կոչի ներքո: Գյումրիում դեկտեմբերի 7-ին, Սպիտակի երկրաշարժի 30–րդ տարելիցին նվիրված միջոցառումների ժամանակ ասաց Ռուսաստանի Դաշնության արտակարգ իրավիճակների նախարարի տեղակալ Նիկոլայ Գրեչուշկինը:
«Դժվար է բառերով արտահայտել կորստի ցավն ու տառապանքը: Երկրաշարժ, որը խլեց հարյուր հազարավոր կյանքեր։ Հաշված րոպեների ընթացքում գետնին հավասարվեցին հայկական գյուղեր և քաղաքներ, հարյուր հազարավոր մարդիկ էլ մնացին առանց տանիքի»,-ասաց Նիկոլայ Գրեչուշկինը՝ նշելով Սպիտակում ավերիչ երկրաշարժի հետևանքով զոհվել է 25 հազար մարդ, 140 հազարը վնասվածքներ են ստացել, շարքից դուրս էր եկել երկրի արդյունաբերական ներուժի 40 տոկոսը:
1988 թվականի Հայաստանի ողբերգությունը դարձավ համամարդկային ցավ: «Երկրաշարժը ցնցեց ամբողջ աշխարհը: Երկրաշարժի առաջին իսկ օրվանից հայերը զգացին մարդկային հոգու ջերմությունը: Այդ օրերին Հայաստան ժամանեցին փրկարարներ Ֆրանսիայից, Շվեյցարիայից, Մեծ Բրիտանիայից, ԱՄՆ-ից, Գերմանիայից, Մեծ Բրիտանիայից, Ռուսաստանից և այլ երկրներից: Օգնության ձեռք մեկնեցին նաև ԽՍՀՄ մնացած պետությունները: ԽՍՀՄ օգնությունը կանոնակարգում էր Նիկոլայ Ռիժկովը: Երևանի օդանավակայանում վայրէջք էին կատարում օդանավեր բեռնված առաջին օգնության պարագաներով, հագուստով, սնունդով»,-հիշեց Ռուսաստանի արտակարգ իրավիճակների նախարարի տեղակալը` հավելելով, որ Հայաստանին այդ օրերին հումանիտար օգնություն ցուցաբերեց ավելի քան 111 պետություն: Միայն 45 հազար շինարար եկել էր ԽՍՀՄ բոլոր հանրապետություններից: Շինարարական առաջին ջոկատները Հայաստան էին ժամանել արդեն դեկտեմբերի 10-ին:
Այսօր ևս կա համագործակցություն ՀՀ և ՌԴ արտակարգ իրավիճակների նախարարությունների միջև:
Ի դեպ, Գյումրի պետք է այցելեր նաև ՀՀ ազգային հերոս, ՌԴ պետական դումայի մշտական հանձնաժողովի նախագահ Նիլոկայ Ռիժկովը, ով սակայն, չկարողացավ ներկա գտնվել առողջական խնդիրների պատճառով: